«Тидым шарне, йолташ!»

Тений конкурсым сар тема дене кылдышна. Йоча-влак Кугу Ачамланде сар нерген веле огыл, кызытсе сар нергенат почеламутым лудыч. Поснак Маядык школын тунемшыже А. Илтибаевам чон вургыжын колыштна. Тудо мӱндыр Украин мландыште вуйым пыштыше Дмитрий Атыев нерген шке шонымо «Ок вучо ынде ава эргым» почеламутшым лудо.

Конкурсыш Дӧртыльӧ районышто марий йылмым да литературым туныктымо чыла школ ушнен, нуно Чарлак, Йывачъял, Елтек, Янтуз, Ярмия да Маядык яллаште верланеныт. 

Йоча-влакын конкурслан тыршен ямдылалтмышт вигак коеш. Тиде текстым палымаш, интонаций, келшен толшо вургемышт, выступленийыштым тӱрлӧ сем дене сӧрастарымышт, видеоматериал гоч раш палдырныш. Кызытсе вашталт толшо илышыште марий йылме дене почеламутым лудшо, шочмо йылмым йӧратыше йоча-влакым ужаш - мемнан районысо да Пошкырт кундемысе веле огыл, чыла марий калыклан кугу куан! Конкурсышто усталыкшым ончыктышо кажне тунемшым жюри тӱрлӧ вер дене аклен да «Шочмо йылмым йӧратымашлан» номинаций дене кумылаҥден. 

Тыге тений мемнам Янтуз ялысе школ шокшын вашлие. Районышто марий йылмым да литературым туныктышо-влак ушем лӱм дене нунылан кугу таум ойлена. Вес ийлан вес марий ялыш каена.