«Шочмо йылмым изинек туныкташ кӱлеш»

- Алёна Андреевна, 21 февральым университетыште кузе палемдеда?  

- Тиде тыглай кече, студент шуко годым тӱрлӧ олимпиадым, викториным эртарена ыле, а кызыт студент шагал, сандене кугу паша ок эртаралт. Филологий факультетыште почеламут конкурсым увертареныт. Марий студент-влакымат ушнаш йодым.

- Йӧратыме калыкмутда уло мо? 

- Тӱҥалтыш школышто тунемме годымак туныктышына Н.И. Исламовын ойлен кодымо «Дурная голова ногам покоя не даёт» калыкмутшо. Кунам иктаж-могай пашам монден колтем, эреак тиде руш калыкмутым да Николай Исламович туныктышемым шарналтем.

- Алёна Андреевна, тендан шымлымаш пашада-влак могай темылан лийыныт? Тидын нерген «Чолман» газетым лудшо-влаклан палаш оҥай, очыни.

- Мый эрвелмарий диалектын балтач говоржым шымленам. Диссертацием «Лексико-семантическая и фонетическая характеристики  балтачевского говора марийского языка» маналтын. Шуко пашам руш да марий йылмым, марий да тюрк йылмылам таҥастарымашлан пӧлеклыме.

- Кызытсе жапыште марий, тыгак моло йылмымат туныктымашым кузе акледа? 

- Кызыт шочмо йылме дечын чылан йӱкшаш тӱҥалыныт. Кугыжаныш кӱкшытыштӧ шочмо йылмым изинек туныкташ кӱлмӧ нерген шоналтыман. Уке гын, марий йылме веле огыл, моло йылмат йомеш.

- Студент-влакым шочмо йылмылан кумылаҥдаш могай йӧным кучылтыда? 

- Эре марий йылме дене мутланена. Чылан марла кутырен моштат. Методикыште улшо у йӧн-влак нерген ойлаш тыршем.

- Башкортостан Республикын калык художникше Г. Калитов ик интервьюшто тыге манын: «Марийский народ будет медленно таять, этот процесс не остановить. Мы уже как айсберг в океане в окружении агрессивной среды, тёплой океанской воды. Рождённому на севере айсбергу, сыну севера южные широты чужды. Но пока ещё плывём». Алёна Андреевна, те марий йылмынам арален, саклен кодена да калыкна эше шуко курым илаш тӱҥалеш манын шонеда? 

- Мый оптимист улам. Марий йылме нигунам ок йом, илышын тӱрлӧ йыжыҥжым сеҥен, эре илаш тӱҥалеш манын шонем.

- Социальный сетьыште шочмо йылме могай лийшаш? 

- Эн тӱҥжӧ марий еҥ кеч-кунамат марла возыжо, тунам молыштат марла кутыраш да возаш тӱҥалыт.

- Шочмо йылмын кечыжлан марий-влаклан мом тыланеда? 

- Кажне марий еҥ шке шочмо йылмыж дене кугешныже, марла ойлыжо, мурыжо, возыжо. Кугезына-влакын арален кодымо йылмыштым шке тукымжыланат кугу пӧлек семын пуэн кодыжо.

- Алёна Андреевна, тендам Шочмо йылмын тӱнямбал кечыж дене саламлена. Тек пашада сеҥымашым, куаным конда, студент-влак шочмо йылмыштым да литературым йӧратен тунемыт, шымлымаш пашашке уло кумылын ушнат да усталыкышт дене ойыртемалтыт.