Тунемше-влак проектым ямдылат

Кугурак класслаште тунемше-влакын ушемышт 5-11 класслаште тунемше ӱдыр-рвезе-влаклан «Ой-каҥаш фестивальым» эртарышт да нуным могай йодыш-влак тургыжландарымым рашемдышт. Инициативный тӱшка-влак проектым ямдылыме пашам тарватышт: тунемше-влак деч ойыштым йодыштыч, презентацийым ыштыльыч. Тӱшкан каҥашен налмек, вич проектым темлышт: «Лӱдыкшыдымӧ школ», «Границым кумдаҥден» георӱдер, «Теннис дене модмо вер», «Школын телевиденийже», «Театр тӱня».

Активист-влак ты пашалан кумылын пижыч, чылажымат тыршен да шот денак ыштышт, да 25 январьыште школысо погынымаште вич команда шке проектшым аралыш, проектын молан кӱлмыжым, цель ден задачыже-влакым, могай лектышыш шуаш шонымым почын пуыш. 

Тулеч вара школышто 5-11 класслаште тунемше-влак коклаште йӱклымашым эртарышт. Комиссийын шотлымыж почеш «Границым кумдаҥден» георӱдерым ыштыме верч эн шуко еҥ йӱклен. Ты сеҥыше проектым инициативный бюджетирований республикысе конкурсыш колтена да туштат сеҥаш тыланена.