Декада усталык шӱлыш дене эртен

Чыла классыште виш урок-влак эртаралтыныт. Туныктышо-влак кызытсе уроклам да урок деч ӧрдыжсӧ мероприятийлам тӱҥалтыш класслаште тӱрлӧ йӧн дене эртараш лиймым ончыктеныт. У стандарт почеш урокым чын чоҥымаш, классыште тӱрлӧ пашам шуктымаш тунемше-влаклан материалым сайын умылаш полшеныт. Тӱҥалтыш класслаште тунемше-влак коклаште ойыртем улмым шотыш налын, урок-влакым модмаш семын эртареныт. Шуко конкурсым, викториным пуртеныт да тӱрлӧ номинацийлаште сеҥыше-влакым палемденыт.

Тыгай паша йоча-влакын творчествыштым вияҥдаш полша. Туныктышо-влак организатор семын мастарлыкыштым ончыктеныт, класслашке пайрем шӱлышым пуртеныт. Тунемше-влак предмет-влак дене сай шинчымашым, тӱрлӧ ситуацийыште шинчымашым чын кучылт моштымыштым, ваш-ваш полшымым, неле задачым шке семын решатлен кертмым ончыктеныт.

Йоча-влакым лудаш кумылаҥдышашлан лицейын библиотекарьже Н. Биктубаева 1-2 класслаште тунемше-влак дене йомак-влак почеш викториным да «Мыйын йӧратыме йомакысе героем» сӱрет конкурсым эртарен. Декада мучко Аван кечыжлан лӱмлалтше йоча усталык выставка пашам ыштен.

Икымше класслаште «Чеверын, Шыже!» утренник-влак пеш сайын эртеныт. Йоча-влак шкеныштын артист койышыштым тӱрыс почын ончыктеныт: почеламутым лудыныт, мурым муреныт, тӱрлӧ модмаш ден конкурслаште усталыкыштым тергеныт.

Школын спортзалыштыже «Движений - илыш» спорт пайрем эртен. Команда-влакын сеҥаш тыршымышт пеш чот шижалтын. Декадым «Йӧратыме авалан шӱм шокшым пуэм» кугу мотор мероприятий дене иктешлыме. Тудо Марий историй да тӱвыра рӱдерыште эртен. Мероприятийым 3А классым туныктышо Т. Петрова тунемшыже-влак дене ямдылен.

Декадым иктешлыме линейкыште чолгалыкым ончыктышо тунемше-влак Чап кагаз да Тауштымо серыш дене палемдалтыныт.