«Чон йодмо годым…»

Виш урокым вӱдышӧ туныктышо-влак А.Д. Султанова (5 классыште предложенийын тӱҥ членже-влакым шымленыт.), Н.Г. Салиева (6 классыште Г. Матюковскийын «Петю» поэмыжым лончыленыт.) да нунын пашаштым эскерыше моло коллегыштат класс-влак дене пашам ышташ куштылго манын палемдышт, молан манаш гын йоча-влакын шинчымаш кӱкшытышт, шочмо йылмым палымышт, лывыргын кучылт моштымышт келге негызан улыт. Тидымак пеҥгыдемден 10-11 класслаште тунемше-влакын творческий журнал семын ончыктымо «Чон йодмо годым» усталык пашашт. Тӱвыра да сылнымут «журналыштым» моткоч оҥайын «лаштыкленыт», мурен-куштенат, модынат ончыктеныт.

Туныктымаште чылажат туныктышо деч тӱҥалеш. А тиде школышто творческий пашалан шӱмаҥдыме йӧным кучылтмаш тукым гыч тукымыш кусна, педколлектившат шкенжын выпускникше-влак денак уэмдалт толеш. Марий йылмым да литературымат ятыр ий годсек выпускникышт А.Л. Юзукбаева туныкта. Шкежат школ парт коклаште шинчымыж годымак сылнымутлан шӱмаҥын, почеламут почеш мурымат возаш тӱҥалын, муралташат пешак кертеш да тунемшыже-влакымат усталык корно дене вияҥын кушкаш кумылаҥден шога. 

Марий гимназийын сулен налме канышыш лекше ончычсо туныктышыжо-влакым вашлиймашке ӱжмыштат семинарын темыжлан моткоч лачеш тольо. Л.А. Русиеван, И.М. Васильевын шкеныштын илыш-корнышт, кузе творческий пашалан шӱмаҥмышт да школышто йоча-влак дене пырля усталык корныштым «таптыме» нерген ойлымыштым колышташ пеш оҥай ыле. Р.К. Ялаева, ожно роношто методкабинетым вуйлатыме пашаште опытым погышо практик семын, семинарын пашажым кӱкшын аклыш, шочмо Чорай школжын ончыкылыкшо уло манын кугешнен палемдыш. 

Марий йылмым да литературым туныктышо-влакын районысо погынымашышт пайдалын эртыш. Тыгай годым уна-влакым вашлийше школын ойыртемалтше тунемшыже-влакым палемдаш да нунылан таумут дене пырля изирак пӧлекым кучыкташ мыланемат пеш сай йӧн лие. «Чолман» газетын увертарыме «Мераҥ идалык» конкурслан йомакым возышо тунемше-влак Анастасия Ильтубаева, Яна Иванова, Есения Сайранова, Василиса Попкова (8 классыште тунемыт), Лада Кутлубаева (10 класс) тидым пӱсӧ уш-акылышт да чолгалыкышт дене суленыт.