- Оксана Викторовна, мо тугай 3D-моделирований?
- Тиде компьютерный программылаште, тыгак кызытсе жаплан келшен толшо у технологий-влак полшымо дене трехмерный, 3D-объект-влакым ыштымаш. Вес семынже, тиде объектын, кидеш кучен, чыла могырымат савыркален ончаш лийме модельжым ямдылымаш.
- Кружокыш могай ийготан икшыве-влак коштыт?
- «Студия 3D-технологий» занятийлаште тӱрлӧ ийготан икшыве-влак шуаралтыт. Нуно кок тӱшкалан шелалтыт. Изирак тӱшкаш 7-11 ияш, кугурак тӱшкаш 12-15 ияш икшыве-влак коштыт. Оласе тӱрлӧ школ гыч мият, тыгак йоча-влакым Ташкиново, Раздолье ялла гыч ава-ачашт конден кодат. Тыште йоча-влак урок деч вара заниматлат, пычкемышалтмекат, мӧҥгышт каяш огыт вашке.
- Нине занятийлаште мом ыштеда?
- Тыште изирак йоча-влак компьютерный графикым, моделированийын, макетированийын, конструированийын негызшым, «бумагопластикым» да моло техникым шымлат, «воздушный» пластилин дене пашам ыштат. Эше нуно 3D-ручка полшымо дене тӱрлӧ арверын макетшым келыштарат. 3D-ручка - дизайн тӱняште у технологий. Тиде маркерым ушештарыше инструмент электроэнергий полшымо дене ручкасе вичкыж шӱртӧ гай пластикым ырыкта да левымыж годым трехмерный объектын модельжым ышташ полша. 3D-ручка дене йоча-влакым олаште кызытеш нигуштат пашам ышташ огыт туныкто. Кугурак ӱдыр-рвезе-влак утларакшым компьютер ончылно Blender программыште йоча площадкын, пӧлемын, интерьерын дизайнжым, тыгак архитектур зданийын, тӱрлӧ арт-объектын модельжым ямдылат. Йӧн лийме годым нуным 3D-принтерыште печатлена. Тыгак Krita программыште сӱретлат, Photoschop-ышто тӱрлӧ плакатым, флаерым, листовкым, визиткым, презентацийым ышташ тунемыт. Тыгак анимацийым шымлена, мультфильмым ыштена: йоча-влак персонажым шонат, тарванылаш туныктат, йӱкаҥдат.
- Тыгай занятий-влак йоча-влаклан мо дене пайдале улыт?
- Технический моделированийлан кӧра йоча-влакын тӱняужмашышт вашталтеш. Нуно кумдан шонаш тунемыт. Технический творчество дене олимпиадылаште, хакатонлаште, креатонлаште, мейкертонлаште вийыштым терген, технический вузлаш куштылгын тунемаш пурен кертыт. Ончыкылык илышыштлан кӱлешан направлений.
- Кружокыш коштшо йоча-влак иктаж конкурслаште усталыкыштым ончыктат?
- Тысе веле огыл, моло олаште, кундемлаште эртарыме конкурсыш чӱчкыдын ушнена. Нунын кокла гыч «Осенний мейкертон» (Вологда), «Цифровая открытка» (Нефтекамск, Мурманск), «Инженеры будущего» (Курск), «Идея, преображающая города» (Москва), «PRO-Дизайн» (Уфа), «PromArt» (Набережный Челна) да тӱрлӧ онлайн-конкурс-влакым палемдаш лиеш. Призовой вер-влак ятыр. Технопарклан арт-объектым ыштымылан кодший «PRO-Дизайн» конкурсышто (Уфа) тунемшем В. Гимадиев республикыште 1-ше верым налын ыле.
- Шкеже кушто тунемында, шочын-кушкында?
- Краснокам район Коян села гыч улам. Туштак кок ий йоча искусство школыш коштынам. Бирск оласе кугыжаныш социально-педагогический академийыште изобразительный искусствым туныктышылан тунем лектынам, тыгак «Компьютерный дизайн» специализацийым налынам. Ик жап Коянысе искусство школышто туныктышым. Тулеч вара Екатеринбург олаште «Kerama Marazzi» ООО-што дизайнерлан ыштышым, Нефтекамск олаш пӧртылмеке, проектировщиклан тыршенам. Тыгак Уральский архитектурный академийыште шинчымашым погышым, «Дизайн интерьеров» специальностьым нальым. Тидлан кӧра кеч-могай пӧлемын проектшым, интерьержым ышташ опыт шагал огыл погынен. Мут толмашеш, кызыт пашам ыштыме кабинетын дизайн проектшымат шкеак, ик йӱдыштӧ, ямдыленам. Тудым у оборудований: электрон доска, 3D-принтер, проектор, ноутбук-влак дене - йӧнештараш «Образование» нацпроект йӧным ыштыш.
- Талантан еҥ усталыкшым чыла вереат шуараш тырша. Те вет эше сӱретлаш йӧратеда?
- Мый эше художественный школышто пашам ыштем. Тушто «основы изобразительной грамоты», «лепка», «декоративно-прикладная композиция», «станковая композиция», «живопись», «рисунок» предмет-влакым туныктем. Яра жапем лийме годым шаржым сӱретлем, книга-влакым лудам.