Кече шижде эрта

Эртыше идалыкыште «Образований» нацпроект полшымо дене школышто чапле ремонтым ыштеныт. «Тышке пашаш толмем годым окна, кӱвароҥа-влак тошто ыльыч. Кокымшо пачашыш кӱзаш тошкалтышым олмыкташ кӱлын», - каласкала тудо. 

Ончыч кӧргыжӧ могай лийын, ом пале, кызыт гын волгалт шога. Чылажымат уэмдыме: школ зданийым тӱжвач сайдинг дене комыжлымо, тошкалтышым плитке дене леведме, спортзалым уэмдыме, окна-влакым, кӱвароҥам вашталтыме, пырдыжым мотор сӱрет-влак дене сӧрастарыме. «Тунемме идалык тӱҥалын гынат, эше ачалыме паша пытен огыл. Школ кудывечыште асфальтым пышташ кӱлеш, тушто ПДД-лан келшен толшо знак-влакым вераҥдыман, чиялтыман. Тений огына шукто докан, вес ийлан кодеш», - ойла Светлана Владимировна.

Кокымшо пачашыште класс, у парт, пӱкен-влакым, пырдыжыште кечыше доскам ужын, ончыкылыкысо илышыш логалмыла чучеш. Мыйын тунемме годым мел дене возенна да, мушкышым нӧртен, йоҥылыш-влакым ӱштынна гын, ынде доска олмеш сенсорный телевизор кеча. Тушан ручка дене возыман, ластик дене ӱштман, але кӱлеш кнопкым темдалат да возымым ӱштын кудалтен кертат. Тыштак мурымат колышташ, иктаж видеомат чӱктен ончаш лиеш. Мыят тиде доскаш икмыняр предложенийым возен ончышым.

«Тений школышто 113 ӱдыр-рвезе тунемеш. Бажан селасе гына огыл, воктенсе Улей, Самосадка, Вязовка ялла да Зеленый поселко гыч йоча-влак шинчымашым погаш толыт, - мутшым умбакыже шуйыш школ директор. - Утларакшым нуно патриот шӱлышеш кушкыт, тӱрлӧ мероприятийым, пайремым эртарена. Мутлан, калык вургем кечым палемдыме годым тунемше-влак шке калык вургемыштым чиен тольыч. Поснак марий тувырым чийыше тунемше шуко ыле. Ожно тудым кузе, кушечын ыштымым, могай ӱзгар-влакым кучылтмым, мо дене сӧрастарымым кумдан пален налыныт. Йоча-влак тунемаш куанен коштыт, кечышт шижде эртен кая. Кастене волейбол, баскетбол дене модаш толыт, моло ял-влак дене таҥасымаш-влакым чӱчкыдын эртарена. Чаманен каласаш логалеш, тений икымше классыште 10 йоча гына тунемеш, но сай шинчымашым налыт манын ӱшанен кодына», - каласыш Светлана Владимировна.