Мыняр ий школ ӱмбак услугым шуктышо организаций семын ончат. Ятырже годым икшывын шинчымашыжат аттестатысе отметкыжлан огеш шу. Мутлан, тений республикысе ик олаште индешымше классыште тунемше кок шӱдӧ шымле шым ӱдыр-рвезе ОГЭ-м сдаватлен кертын огыл. Нунын кокла гыч пелыже яра (пуста) бланкым сдаватлен, маныт. Тиде мо нерген ойла? Нуно шкевуя шонен, ыштен огыт мошто. Интернет гыч ямдым але вес еҥын полышыжым вученыт. Молан? Туге тунемыныт. Нунылан шукыж годым объективный отметкым шынден огытыл. Ведомостьышто, могай кӱлын, тугай каен. Ынде тидым вашталтынешт. Туге гынат южо ава-ача йочам пашаш шуараш кӱлмӧ нерген вашталтышым кокытеланен акла. Вуйлык-влакын «Ожнырак пасуштат пашам ыштенна» манмыштлан «Тунам телефон лийын огыл» пелештышыжат уло. Теве тыге: кид вий дене ыштыме пашам телефон алмаштен шуктен. Кеч-момат пудырташ вашке лиеш, угыч поген шындаш гына жап кӱлеш. Ончыкыжым мо лиеш? Йолагай икшывына-влакым вий шутымо сомылым ышташ кумылаҥден кертына мо? Илена - ужына.