Все новости

Чеверын, шочмо школ!

22 майыште республикысе школлаште 9, 11 класслаште тунемше ӱдыр-рвезе-влаклан пытартыш йыҥгыр йоҥген. БР Образований министерствын увертарымыж почеш, торжественный линейка-влак 1,3 тӱжем школышто эртеныт, тушко 47 тӱжем 9 классыште, 14,5 тӱжем 11 классыште тунемше ушнен.  Калтаса районысо Актыган ялысе школат шке тунемшыже-влакым кумда илыш-корныш ужатен. Тушто тений индешымше классым вич ӱдыр-рвезе тунем лектын.

Класс вуйлатышышт Л.А. Султангареева 9 классыште тунемше-влакым кумда илыш-корныш ужата. Л. Яманаеван колтымо фото-влак.
Класс вуйлатышышт Л.А. Султангареева 9 классыште тунемше-влакым кумда илыш-корныш ужата. Л. Яманаеван колтымо фото-влак.

Тунемше-влакым саламлаш райрӱдӧ, ялсовет администраций гыч уна, тыгак ава-ача-влак миеныт. Шочмо школышт йоча-влаклан шинчымашым пӧлеклен, йолташ-влакым муаш полшен, илышлан ямдылен. Школ дене чеверласыме пайремыште йоча-влак шергакан туныктышышт, ава-ача-влаклан таумутым ойленыт, пеледыш аршашым кучыктеныт. Нунынат тунемше-влаклан лӱмлымӧ поро сугыньышт йоҥген. 

Ончылно тунемше-влакым кугыжаныш экзамен-влак вучат. Ӱдыр-рвезе-влак, илыш корныда тӧр, волгыдо лийже. Тӱҥжӧ - келшыше профессийым ойыраш да илышыште шке верым муаш.

Автор:Людмила Шавалиева
Читайте нас: