Изи школын илышыже

Тудо ийын кеҥеж  йӱран лие, школым ыштен пытарымешкышт, йӱр ыш чарне. Сандене кок ий жапыште кӱвар ден кӱваргашта шӱяш тӱҥальыч.

Школ директорымат вашталтеныт, ӱдырамашым шогалтеныт. Тудыжо ачалыме пашам умыла мо? Но, ача-влак дене мутланен, ыштышаш паша-влакым радамленыт. Фундаментыште ик рожымат кодымо огыл улмаш. Тидыже Ӱткӱстӧ школын ойгыжо гына лийын огыл. Колхоз полшымо дене шуко вере икгай проектан изи школ-влакым ыштеныт, но кӱвар кок ий гына чытен. Кок рвезе, В. Илибаев ден В. Шамыкаев, кажне класслан фундаментеш рожым шӱтеныт. Кӱвар шӱймым чарнен, южо классыште кызытат тошто кӱварым ужаш лиеш. Роно оҥам пужараш станокым, изиш оҥам пуэн. Тыге ачалыме паша тӱҥалын. Школлан пум ямдылаш кӱлын огыл, кочегаркылан шӱчым пуэныт. Но котелжым эре вашталтылаш верештын. Туныктышо-влаклан пулан ойырымо изирак делянкыште сай пушеҥгыжат лийын. Нуным, ойырен коден, школыш шупшыктеныт, пилорамыште шелыныт да пужареныт. Тыге ялысе столяр-влак полшымо дене икмыняр ий гыч чыла кӱварым вашталтеныт. Но тидден паша пытен огыл - рама-влакат йогаш тӱҥалыныт. Садлан кодшо оҥа-влак дене рамым вашталтеныт. Кажне ийын налын шогымо делянка-влак ӱдырамаш директорын пашажым куштылемденыт. 

Школ ачалыме деч вара пырня-влак погыненыт. Школ вуйлатыше изирак мастерскойым чоҥаш шонен пыштен. Материал ситен. Окналан, кӱварлан шкенжын тошто пӧртшӧ гыч конден. Чыла тиде паша ача-ава-влак да марийже полшымо дене ышталтын. Но школышто йӱштӧ лийын, труба-влак классым ырыктен огытыл. Эше ала-молан эре шӱтленыт. Шӱтлышӧ рожым петыраш тунемыныт. Колхозысо инженер, труба-влакым ончымеке, регистрым ӱстараш темлен. А тидлан адакат труба кӱлын. Кушто муман? Икмыняржым Караидель школ пуэн. Кажне классыште кок регистрым ешарымек, шокшо лийын. А кужу трубаже эре шӱтлен, шокшо вӱд фонтанла шыжен. Кеҥежым чылажымат вашталташ йӧным муыныт, но котел-влакат чонеш витареныт. Кушто гына нуным кычалме огыл?! Ик гана теле покшелне котел пудырген. Уым Пермь гыч кондаш кӱлын. Идалык мучаште бухгалтерий кугу оксам муын огыл. Школ вуйлатыше шке оксажым пуэн, котелым конденыт. Вес ийжылан котел акшым тӱленыт. Ял калык полшымо годым ӱдырамашлан пашам ышташ куштылгырак чучын. 

Тунам телефон лийын огыл. Улшыжат южгунам сайлымаш годым гына ыштен. Автобус укелан кӧра йолын кошташ верештын. Эрдене школ директор пошкудо татар ял марте ныл километрым ошкылын, а тушко автобус толын. Тыге школ вуйлатыме пашаште коло ик ий шижде эртен каен. Кызыт тудо сулен налме канышыш лектын, а школлан тений 36 ий темеш.

Ынде илыш куштылемын. Но ялыште йоча-влак шагалемыныт. Кӧ пала, ала мемнан школымат петыраш жап шуын? Районышто кок марий школ веле, кок школынат ойгыжо икгай.