Шочмо йылме дене хрестоматий кӱлеш

Тудо йомак книгам, Интернетыште муын, чапле презентацийым ыштыш да флешкыш кусарыш. Йомакым йоча-влак дене пырля телевизор гоч ончышна. Тиде сай, конешне. Но кажне лудмаш занятийлан еҥым ячаш сай огыл вет, Интернет гыч лудмат сӧрал ок кой. Мемнан йоча жапысе «Детская литература» изданийын вичкыж книгаже-влак кушко йомыныт гын?

Кызыт йочасадлан мотор деч мотор чиян руш хрестоматий пеш шуко, могай гына издательство нуным огеш савыкте! Но йочалан лудаш йӧрышӧ произведенийжым парня дене шотлаш лиеш. Нуным могай программа почеш ямдылымым тогдаяш гына кодеш.

Йочасадлан марий хрестоматий уло мо? Совет жапыште лийын. Тунамсе руш хрестоматий деч нимынярат ӱлыш огыл улмаш. Тушто почеламут, йомак, ойлымаш-влакым календарь, кечышот почеш вераҥденыт, чыла кугыжаныш пайремым авалтеныт. Идалыкын иктаж-могай жапше нерген произведений кӱлеш - вуйлымашым веле шергал. Тиде хрестоматий шукертак «шоҥгемын», а у эше лектын огыл. Тудо кӱлеш мо? Интернетыште чыла улыс… Кӱлеш улде мо! Теве шоналтыза, Аван кечыжлан пайремым ямдылена, йоча-влаклан почеламутым, мурым туныктена. Тугайым ойырена, могайым вашке муаш лиеш. Руш йылме дене книгаштат, Интернетыштат шуко. А шочмо йылме дене кычал муаш ятыр  жапым «эҥыремышвотышто» эртараш кӱлеш. Тидлан шагал еҥын чытышыже сита. Сандене марий воспитателят, ава-ачат икшывылан рушла почеламутым да мурым туныктат. Шочмо йылмым арален кодынена гын, марла хрестоматийым угыч лишыл жапыштак лукташ кӱлеш. Тушко эше пайрем сценарий да ксилофон дене шокташ марий сем-влакын нотыштым пурташ гын, пеш сай лиеш ыле.