«Кеч-могай пашам йоча дене пырля ыштыман»

- Вероника Виталиевна, икымше урокда кузе эртымым шарнеда мо? 

- Икымше гана марий йылме урокым вӱдышым. Пашаш тӱҥалме ийынак республика кӱкшытан семинарыште марий йылмым да литературым туныктышо-влак ончылно виш урокым ончыктышым. Тиде кандашымше классыште «Сар да марий калык» темылан марий литератур урок ыле.

- Оҥай. Кӧм «Тиде мыйын наставникем» манын кертыда? 

- Мишкан районысо Чорай кыдалаш школышто тунемме жапысе чыла туныктышемым наставникемлан шотлем. Нуно ответственный лияш, мутым кучаш туныктеныт.

- Жап ончыко кая, технологият эре уэмеш. Пашаш толмыда деч вара тачысе кече марте туныктымо паша чот вашталтын мо?

- Таче уло паша компьютер дене кылдалтын, экран гоч чыла ончыкташ лиеш…

- Тендан пашам ыштыме жапыште тунемше-влакын койышышт кузе вашталтын? 

- Шочмо йылмын моторлыкшым, кӱлешлыкшым умыландараш пеш йӧсӧ. Ялысе икшыве-влак дене пашам ышташ лиеш, шонем.

- Кызытсе илышыште педагог ден наставник могай лийшаш улыт? 

- Эн ончыч авторитетым ик ганат волтыман огыл, йоча-влакым умылен моштыман, кеч-могай пашам нунын дене пырля ыштыман (кидым кӱсеныш чыкен шогыметым ӱдыр-рвезе-влак вашке ужыт). Йоча-влак чон почын кутырен моштымым кӱкшын аклат. Илышыште «Ончыко, эре ончыко!» девиз дене ошкылман.

- Кызытсе образований системыште мом вашталтеда ыле? 

- Йоча-влак дене шукырак жапым эртараш, кагаз отчётым изишак кораҥдаш, туныктышын статусшым кугемдаш кӱлеш, шонем.

- Вероника Виталиевна, йодыш-влаклан вашешташ жапым ойырымыланда кугу тау! Пашаштыда сеҥымашым, чоныштыда ласкалыкым тыланена.