Наставникын полышыж деч шуко шога

Конешне, чылажат вигак кӱлеш семын лектын огыл. Педагогика сомылышто  мыланем тӱҥалтыш жапыште полышым пуышо наставник, туныктышем-влаклан тауштем. Воктенем талантан, усталык шӱлышан педагог-влак пашам ыштеныт. Нуно мыйым йоча-влакым, пашамым уло чон дене йӧраташ, изи ньога-влак дене вашкылым муаш, ава-ачашт дене чын мутланаш, дидактикын правилже-влакым шукташ туныктеныт. 

Наставникын полышыжо - тиде самырык воспитательлан у коллективыште пашам ышташ тӱҥалмыж годым нелылыкым сеҥаш полшымаш, кӱлеш каҥашым пуымаш, практический опытым шарымаш, самообразований дене заниматлаш кумылаҥдымаш. Педагогикыште наставничество тӱрлӧ лиеш. Мыйын шонымаште, нунын кокла гыч эн пайдалылан индивидуальный да виш наставничествым шотлыман. Тыгодым самырык воспитатель ден наставник коклаште тӱҥжылан ваш умылымашым, тӱрлӧ семын - телефон, скайп денат, социал кылыштат - ваш мутланымашым шотлыман. Конешне, тидым илышыш шыҥдараш куштылго огыл, туге гынат лиеш.