Все новости
Шинчымаш кугорнышто
17 шорыкйол 2023, 15:32

Оҥай, кунам чонлан келша

Школышто туныктымо программа деч посна йоча-влаклан внеклассный пашан кӱлешлыкшым кеч-кунамат акленыт. Урокышто посна предметла дене шинчымашым пуаш тыршат гын, урок деч ӧрдыжысӧ мероприятий тӱням кумданрак умылаш да утларак пален налаш полшымыж дене ойыртемалтеш.

Комсомол ынде уке гынат, школ илышыште чолга, «визытан» отметкылан гына тунемше-влак улыт. Ака-шӱжар Вероника ден Анна Ижбулатовамытын да Анастасия Мазитован воктенышт парт коклашке шинчын, шкежат йоча годсым шарналтышым.
Комсомол ынде уке гынат, школ илышыште чолга, «визытан» отметкылан гына тунемше-влак улыт. Ака-шӱжар Вероника ден Анна Ижбулатовамытын да Анастасия Мазитован воктенышт парт коклашке шинчын, шкежат йоча годсым шарналтышым.

Конешне, кызытсе образований системыште кугыжаныш темлыме программын стандарт кышкаржым шуктымым веле туныктышо-влакын тӱҥ сомылышт семын ончат. Но урок деч ӧрдыжысӧ пашам, поснак йоча-влакын кумылыштлан келшыше мероприятийым, оҥай еҥ-влак дене вашлиймашым да тулеч молымат эртарымым нимо денат вашталташ ок лий. 

Южгунам «Тунемше-влакын интересышт уке» манмымат колаш логалеш. Но тудо вигак толын огеш лек. Можыч, шке туныктышышт деке тунем шумыштлан, урокыштат тудым веле колыштмыштлан кӧра класс деч ӧрдыжысӧ пашам эртарымыжат урок гай чучеш. Но тыгай годым вес йӧн уло: шаблон деч кораҥаш, ӧрдыж гыч вес еҥым ӱжаш, оҥай темым тарваташ…

Ӱлыл Качмаш школышто вашлиймаш деч вара мый тыгай шонкалымаш дене пӧртыльым. Тунемше-влакын йокрокланен шинчымыштым шым шиж, кутырымашкат кумылын ушнат, йодыш-влакланат ӧрын шогыде вашештат. Ик урокышто, марий сылнымут гыч тӱҥалын, литератур илыш, калык йӱла, йомак-влакын калык койыш-шоктыш дене кылдалтмышт нерген кӱчыкын, но чылажымат шерын лектын шуктышна. Тыгай творческий мероприятийлан тунемше-влакым кумылаҥден шогышо, тидлан йӧным кычалше школ вуйлатыше да туныктышо-влаклан таум гына каласыман. Вет тудо самырык тукымым у шинчаончалтыш да усталык шӱлыш дене воспитатлен кушташ полша.

Автор:Игорь Губаев
Читайте нас: