Марий йылмым туныктышо-влакын семинарышт

Семинарыш погынышо-влак ныл виш урокым онченыт. К.Г. Мусина визымше классыште «Обращений», И.К. Шамуратова кудымшо классыште «Чот мут» теме-влак почеш урокым ончыктеныт. Шымше классыште «Безличный глагол» теме почеш Н.Д. Байдимирован урокшо пеш оҥайын эртен. А латикымше классыште тунемше-влак Я.В. Саликаева дене пырля В.А. Абукаевын «Ава шӱм» ойлымашыжым лончыленыт. 

Урок-влак деч вара «Шорыкйол пайрем» внеклассный мероприятийыш ӱжыныт. Тудым Ирсай школышто марий йылмым туныктышо Я.В. Саликаева да класс деч ӧрдыжсӧ пашам вуйлатыше Л.П. Саляева ямдыленыт. Кандашымше классыште тунемше-влак чылт артистла койыныт: мурым муреныт, оҥай модыш дене модыныт, марла куштеныт, мужедыныт, пайрем йӱлам мастарын ончыктеныт.  

Мучашлан «йыргешке ӱстел» коклаште урок-влакым лончыленна. Кажне урокым кӱкшын аклыме. Туныктышо-влак у йӧн-влакым моштен кучылтыныт, тӱрлӧ оҥай пашам эртареныт, шуко кӱлешан да пайдале материалым ямдыленыт. Ирсай школышто пеш оҥай выставкым чумыреныт. Тыште тунемше да туныктышо-влакын кидпашашт дене палыме лийынна, чонлан келшыше аралтышым але изи шондыкым (шкатулкым) налынна. Марий йылмым туныктышо-влак лӱм дене Ирсай школ администрацийлан, туныктышо да тунемше-влаклан кугу таум каласена.