Кӱлешан йодышлам каҥашышт

Семинарым оласе образований управленийын начальникше Р.А. Уразаев почо да проектыш ушнымын кӱлешлыкшым палемдыш. Республикысе Образований да наука министерствын вӱдышӧ специалистше Ф.Г. Ахмадеева семинарыште погынышо-влаклан у шинчымашым налаш йӧным ыштыме нерген ойлыш. «Россий Просвещений министерствын школжо» проектын региональный координаторжо, Образованийым вияҥдыше Башкир институтын профессоржо, педагогика наука доктор А.Г. Маджуга проектын модельжым ямдылыме да школ илышыш шыҥдарыме, единый образовательный кумдык нерген каласкалыш. Нефтекамскысе коррекционный школ-интернатын директоржо З.А. Хабибуллина семинарын цельже дене палдарыш - тиде апробаций площадкыште шкалан шке диагностикым ыштымын лектышыжым иктешлымаш, школым вияҥдыме программыште стратегий ориентир-влакым палемдымаш.

Икымше ужашыште туныктышо, воспитатель, педагог-психолог-влак мастер-классым, «Практико-ориентированный» блокышто тӱрлӧ сынан занятий-влакым ончыктышт. 

Вара чылан, иквереш чумырген, «Россий Просвещений министерствын школжо» проектым илышыш шыҥдарыме направлений-влак» темым каҥашышт. Тушто кадрым ситарыме, туныктышо-влакын шинчымашыштым пойдарыме, квалификацийыштым нӧлтымӧ, каҥашым пуымо йодышлам тарватышт. Кундемысе ресурс рӱдерын вуйлатышыже З.А. Хабибуллина «Инклюзивный образовательный среда» направлений дене пашам ыштыме, Нефтекамск оласе школлаште да республикын йӱдвел-касвел зоныштыжо инклюзивный средам вияҥдымаште рӱдерын пашаже кӱлешан улмым палемдыш. Директорын алмаштышыже М.В. Шамратова ресурс рӱдерын ончыкыжым шуктышаш пашаже нерген каласкалыш, а туныктышо ден специалист-влак ОВЗ да инвалид икшыве-влак дене кузе пашам ыштымым эше ныл направлений: тазалык, усталык, воспитатлымаш, профориентаций гоч - почын пуышт.

Семинарым «Россий Просвещений министерствын школжо» проектым илышыш пуртымо стратегий ориентир-влак» блок дене мучашлыме. Модератор-влак А.Г. Маджуга, Образованийым вияҥдыше Башкир институтын доцентше, педагогика наука кандидат Л.Ф. Хайртдинова,  З.А. Хабибуллина «Ончыкылык школлан проектым ыштена» стратегий сессийлан установкым пуышт. Семинарын участникше-влак «Просвещений министерствын школжо» модельым проектироватлышт да аралаш ямдылышт. Мучашлан туныктышо, воспитатель да тунемше-влак «Мемнан школ альбомыш ончалза» усталык проектыштым муро, куштымаш да почеламут-влак дене сӧрастарышт.