Семинарым шочмо йылмылан пӧлеклышт

Тушто погынышо-влак шочмо йылмын кӱлешлыкше да тунеммаште могай нелылык улмо нерген йодыш-влакым тарватышт. Акпарс школышто 94 процент йоча марий йылмым тунемеш. 11-ше классыште веле ЕГЭ-м сдатлышаш верч шочмо йылме шотеш руш йылмым ойырен налыныт. Марла учебник шотышто. Тений чыла школышкат у пособий-влакым пуэныт, тунемаш кумылан-влак гына шукырак лийышт ыле.

Уна-влакым вашлияш уло школ дене ямдылалтыныт. Фойеште «Мастар кид» кружокыш коштшо йоча-влакын ямдылыме выставкым ончыктышт, директор Г.Ф. Габдрахманова школ мучко экскурсийым эртарыш, А.А. Асмаева музей дене палдарыш. Погынышо-влак коклаште образований пӧлкан методистше Г.Ф. Галимова, районысо методушемын вуйлатышыже А.А. Гиздатуллина лийыныт. Виш урок-влакым 5-ше классыште марий литературым туныктышо В.А. Гибадуллина, 6 классыште марий йылмым Е.Д. Курмакаева эртареныт. Тӱрлӧ йӧным кучылтын, туныктышо-влак урокышто шуко пашам шуктеныт. Ончышо-влак уроклан сайын ямдылалтмым палемденыт. В.А. Гибадуллина кугу опытан туныктышо, 19 ий марий йылмым туныкта, Е.Д. Курмакаева ятыр ий руш йылмым туныктен, ынде кокымшо ий йоча-влакым шочмо йылмылан шӱмаҥда.

Урок деч вара Ава-влакын кечыштлан пӧлеклыме «Аван шӱм-чонжо шочшыжо пелен» пайремым эртарышт. Вӱдышӧ-влак А. Кунаккузина ден И. Исламова ава нерген шуко поро, ныжыл, сылне шомакым ойлышт. Экраныште ава-влакын сылне деч сылне фотоштым ончыктышт, йоча-влак аваштым тӱрлӧ йылме дене саламлышт. Тӱҥалтыш классыште тунемше-влак «Антошка» мурым марла модын ончыктышт, «Авамлан пӧлек» мурым шергылтарышт (туныктышышт Н.М. Атнабаева ден З.Б. Ильгузина). Пайремыш погынышо-влак рӱжге «Каласе, авием» мурым муралтышт, ӱдыр-влак марла куштымашым тавалтышт. Д. Танаева ден А. Идылбаева ава нерген такмак-влакым шергылтарышт. Ӱдыр-эрге-влак почеламут-влакым лудыч да кажне авалан шке ыштыме пеледышым кучыктышт. Туныктышо-влак «Ава, авана» муро дене пайремым мучашлышт. Ятыр ий марий йылмым туныктышо Л.Д. Курмакаева йоча-влаклан шочмо йылмым йӧратен тунемаш сугыньым пуыш, паша ветеран Т.М. Атнакаева шочмо йылме дене ешыште мутланаш кӱлмым палемдыш. Г.Ф. Галимова калык ончылно чӱчкыдынрак шочмо йылме дене мероприятий-влакым эртараш темлыш.