Марий тӱвыралан шӱмаҥден куштат

О.И. Кугубаевам, Мишкан район Ардаш ӱдырым, Благовещенск педучилищым тунем пытарыме деч вара Краснокам район Ӱлыл Такия школыш пашам ышташ колтеныт. Тӱҥалтыш классыш коштшо изи ӱдыр-эрге-влак самырык туныктышыштым тунар йӧратен шынденыт, эсогыл икмыняр гана тетрадь коклаш йӧратымашышт нерген запискымат возен пыштеныт, перемен годым да урок деч вара эре йырже пӧрдыныт. 

Но йӧратыме Ольга Ильиничнаштым ты ялысе качымарий шкенжын илыме Когалым олашке пелашыжлан наҥгаен. Ик жап гыч О. Кугубаева уэш Нефтекамскеш вожаҥын, Когалымыште йочасадыште пашам ыштыме деч вара тыштат тыгай корнымак ойырен. Ты ийлаште Бирск кугыжаныш пединститутышто кӱшыл шинчымашым налын. Вашке гыч педагогический стажше чырык курымыш чумырга, тушеч куд ийжым школышто, латиндеш ийжым йочасадыште тыршен.

Тудлан йочасадыштат Ӱлыл Такиян шочшыж дене пырля пашам ышташ пӱрен улмаш. Шке ялысе кандашияш да Ушмен кыдалаш школым тунем лекме деч вара М.И. Вайтина ӱмыржӧ мучко, 37 ий, оласе йочасадыште пашам ышта. Профессионал шинчымашым шочмо-кушмо кундемыштак налын - Нефтекамск педколледжым тунем пытарен. 

Ольга Ильинична ден Маргарита Изибаевна пырля кок тӱшка йочам, кугемден, школыш ужатеныт. Кызытсе тӱшкашкышт 25 икшыве коштеш, тушеч пелыже наре марий, южыштын ачаже але аваже мемнан калыкын шочшыжо улыт. 

Воспитатель-влак моло йочасадласе гаяк программа почеш пашам ыштат, икшыве-влаклан шинчымашым пуышо да сай айдемым ончен кушташ полшышо тӱрлӧ мероприятийым эртарат, нуным олаште эртарыме «Калык вургем», «Урал-батыр» башкир калык эпосым эн сайын каласкалыше», «Тукайын семже», «Гагаринец улына» да моло конкурслаш ушат. Но тыште эше ик ойыртемым палемден кодыман. Нуно шке группыштышт ӱдыр-рвезе-влакым марий йылмылан да тӱвыралан шӱмаҥден куштат. Тидым паша программыштат радамленыт да  коктынат Башкир кугыжаныш университетын Бирск филиалыштыже марий йылмым келгынрак туныктымо шотышто шинчымашыштым пойдарен толыныт. Икшыве-влак дене марла мурат-куштат, нуным марла модыш дене модыктат. Нунылан йочасадысе музыкальный пашаеҥ Г.Н. Сафиуллина полышкала. Марий семым шокташ гына огыл, эше пырля муралташат тунемеш да вара ньога-влакымат туныкта.

Ик гана нунын эртарыме мероприятийыште лияш да изи падыраш-влакын кузе шинчашт йӱлымым, марий да моло калык вургемым чиен, уло кумылын мурен-куштымыштым ужаш логалын. Садлан кутырымо годым «Моло калык гыч улшо икшыве-влакын ача-авашт огыт торешлане дыр?» йодышат шочо. «Тыгай ойым тарватыше лийын огыл. Ача-ава-влак эн ончычак икшывыштым тыршышан да поро воспитательын кидыш пуаш шонат, садлан, илыме верым вашталтат гынат, шукыж годым машина дене мемнан йочасадышкак кондыштарат. Йоча-влаклан шкаланыштат калык вургемым чияш да почеламутым каласкалаш, муралтен чӱчкалташ пеш келша. Марий йылме да тӱвыра дене кылдыме элементлам кажне занятийыш пуртена», - манеш Ольга Ильинична.  

Шке паша опытышт нерген О. Кугубаева тӱрлӧ научно-практический конференцийлаште каласкален, пырля виш занятийлам эртареныт. Тыршен пашам ыштыше, сай лектышыш шушо воспитатель-влакым йочасадын ятыр Чап грамотшо да таумутан серышыж дене, Маргарита Изибаевнам Нефтекамск ола округын Советшын таумутан серышыже, Ольга Ильиничнам  Нефтекамск ола администрацийын образований пӧлкажын Чап грамотыж дене палемденыт.