Кажне икшыве шке ачажым эн виянлан, чолгалан да мастарлан шотла. Кеч-могай йочанат ачажат, аважат лийшаш улыт. Кузе кайык ик шулдыр дене гына чоҥештен огеш керт, тугак икшыват кок йӧратыше еҥ - ачаж ден аваж пелен - кушшаш.
Чорай йочасадыш коштшо кугурак тӱшкасе ӱдыр-рвезе-влак теният Ача-влакын кечыштым куанен вучышт. Кажныже шке ачаж нерген каласкалыш, тудын портретшым сӱретлыш, пӧлекым ямдылыш…
Пайремнам тушто дене тӱҥална, а вара йоча-влак жаплан шке «ача» лийыч да тӱрлӧ конкурслаште вийыштым тергышт. Модмо коклаште шофер да парикмахерат лийыч, колым эҥырышт, ӱдыр-влак дене мужыр дене куштышт…
Кажне икшыве шке ачажлан почеламутым пӧлеклыш, а мучашлан чылан пырля «Ачай» мурым муралтышт. А мый нунын ачаштлан видеосаламлымашым ямдыленам ыле. Тыге, пырля тыршен, нунын кумылыштым нӧлтал кертна, шонем, вет ача-влакын куанышт - йочан куанже.