Молан тыге лийын?

Обрнадзор школым текшыраш тӱҥалеш гын, эн ончыч мом йодеш, шонеда? Туныктымо программым. Тудо чыла шотыштат сай лийшаш: ФГОС-лан келшыше, республикысе закон-влакым шуктышо, кажне запятой ден точкыжо верыштыже шогышаш. Шочмо йылмым туныктымо программым налаш гын, тудо моло предмет коклаште конкуренцийым сеҥен кертшаш. А учебниклаште кажне предложений ден текстше патриотизм шӱлышым вияҥдышаш, моло предмет дене оҥай ешартыш фактым пуышаш. Географийым, историйым але моло предметым туныктышо тунемше деч «Тидым тый кушеч палет?» манын йодеш гын, тудо, кугешнен, «Марий йылме урок гыч!» вашештен кертше. Вот тунам нимогай обрнадзор шочмо йылмылан ойырымо шагатым шыгыремден огеш керт. 

Тений у тунемме ий шуко вашталтышым ышташ йодо. Икымше да визымше классыш толшо ӱдыр-рвезе-влак кумшо поколений ФГОС дене тунемаш тӱҥальыч. Тудын дене келшышын, туныктымо программа единый лийшаш. Тугеже, чыла йочат икгай учебник дене тунемшаш. Но нуно эше уке улыт. Тымарте, кокымшо поколений ФГОС дене келшышын, кажне школын шке программыже лийын. Тудын почеш туныктышо кудло процент деч шагал огыл федеральный программым, нылле процент марте шке ыштыме але парциальный программым пуртен кертын.

Пытартыш увер-влакым лудын, тогдаена: южо марий йылмым туныктышын кокымшо поколений ФГОС-лан келшыше программыжат ышталтын огыл улмаш. А вет тудын дене йоча-влак латкум ий тунемыныт! Учебник-влак толын веле шуыныт, да качествыштат сай манаш огеш лий. Ынде кумшо поколенийыш куснена. Тудын негызеш туныктышо-влак сай программым да кажне класслан учебникым ыштен кертшаш улыт. Нунылан, чумырген, кидыш кагазым да ручкам налын, кызытак пашалан пижаш кӱлеш. А марий ялласе йочасадыште да тӱҥалтыш школышто чыла предметым шочмо йылме дене туныкташ кӱлмӧ нерген совет жапысе шонымашымат чынлан шотлыде ок лий.