Мишкан селасе агропромышленный колледжлан - 30 ий

А чылажат 1992 ий 18 сентябрьыште тӱҥалын. Лач тиде кечын РСФСР-се Образований министерствын 64 №-ан «Об организации профтехучилища в селе Мишкино» приказше лектын. Ик жап гыч Башкир АССР-се Калык образований министерствын 1992 ий 5 октябрьысе 545 №-ан  приказше почеш «Мишкан» совхоз негызеш 150 №-ан профессионально-технический училище почылтын. 

Илен-толын, тиде тунемме заведений икмыняр гана лӱмжым вашталтен. 1995 ийыште ПТУ 150 №-ан профессиональный училищыш, 2011 ий сентябрьыште, Башкортостан Республика Правительствын кӱштымыжӧ да БР-се Образований министерствын приказше почеш, «150 №-ан профессиональный лицей» тӱҥалтыш профессиональный образований государственный бюджетный образовательный учрежденийыш савырнен. 

2012 ий 29 декабрьыште Россий Федераций Президент В.В. Путин «Об образовании в Российской Федерации» 273-ФЗ №-ан федеральный законым подписатлен. Ты жапыште тӱҥалтыш профессиональный образований кӱкшытым кӱлдымашлан шотлымо шотышто каҥашымаш эртен. Йодыш лектын: профессиональный лицей пашам ышташ тӱҥалеш але уке? Каҥашымаш деч вара тӱҥалтыш профессиональный образованийым кыдалаш профессиональный образованийыш пуртеныт, тудо кок тӱрлӧ программа гыч шоген: квалификациян пашаеҥ ден служащий-влакым да кокла звеносо специалист-влакым ямдылымаш. Реорганизацийын икымше йыжыҥже лицейлан колледж статусым пуымаш лийын.

Тыге, Башкортостан Республикысе Правительствын 2014 ий 5 июньысо пунчалже почеш, «150 №-ан профессиональный лицей» тӱҥалтыш профессиональный образований государственный бюджетный образовательный учреждений «Мишкан агропромышленный колледж» маналташ тӱҥалын. 

Ынде тӱҥалтышке пӧртылына. 1992 ийыште кум группым чумырымо: тракторист, каменщик да штукатур-маляр-влак. 

Икымше урок-влак ремонтым ыштыме йӱкыштак эртеныт. 

Ик жап гыч кабинет-влак келшыше сыным налыныт, тушан кӱлеш оборудованийым вераҥдыме.

Тунемше-влакын чотышт кажне ийын артен толын, у группа-влакым погеныт. Тидлан кӧра тунемме кабинет-влакым артыраш кӱлын. Сандене 120 веран пристройым чоҥаш тарваненыт.

Пристройым 1996 ийыште чоҥен пытареныт. Ик жап гыч училищылан АТП гаражым пуэныт, тушто слесарный мастерской, автомобиль ден ял озанлык машина-влакым технически обслуживатлыме класс-влакым оборудоватленыт, пашаеҥ-влаклан кок пачеран кум пӧртым чоҥеныт. 1997 ий февральыште училищылан столовыйым пуэныт.

Мишкан агропромышленный колледж Республиканский профессиональный мастарлык олимпиадылашке эре чолган ушна. Колледжын тунемшыже-влак «Ял озанлык производствын тракторист-машинистше» профессий почеш Башкортостанын чемпионатыштыже (калык коклаште тыгай таҥасымашым ял озанлык колледж ден техникумлаште тунемше куралше-влак кокласе таҥасымаш маныт) тӱрлӧ ийлаште индеш гана чемпион лийыныт. Чемпион лӱмым Кирилл Александров, Тимур Изибаев, Александр Янбахтин, Вадим Валиуллин да молат сулен налыныт.

«Мӱкш ончышо» профессий почеш тунемше-влак Башкортостанын чемпионжо лӱмым кандаш гана сеҥен налыныт. 2021 ийыште Уфа олаште Россий Федерацийысе кокла профессиональный учрежденийлаште тунемше-влак кокласе «Самырык профессионал-влак» (WorldSkills) IX национальный чемпионатын финалже эртен. Тушто РФ-се 76 субъект гыч 1786 конкурсант 105 компетенций почеш вийжым терген. Мишкан агропромышленный колледжын студентше Вадим Муртазин 16 гыч 22 ияш-влак коклаште мӱкш ончымо паша дене республикын чапшым арален. 7 участник коклаште Вадим эн шуко баллым поген да сеҥышыш лектын. Тумарте да тулеч вара «Самырык профессионал-влак» таҥасымаште селасе колледж ден техникумлаште тунемше-влак кокла гыч нигӧ чемпион лийын огыл. 

«Кермычым оптымо» дене региональный чемпионатыште студентна-влак кум гана республикын чемпионжо лийыныт. Тиде лӱмым Максим Аймурзин, Александр Имаев да Вадим Валеев сулен налыныт.

Тӱрлӧ ийлаште математика дене республиканский олимпиадылаште да конкурслаште Алексей Байбатыров, Константин Ижбулдин, руш йылме да литератур, физика дене Регина Карамова, Галия Нуртдинова, историй дене Дмитрий Ибагишев сеҥеныт.

Профессиональный образовательный организацийлаште тунемше-влак кокласе «Чонан кисть» республиканский сӱрет конкурсышто Лиана Янгубаева «Башкортостан - келшымаш кундем» номинацийыште сеҥен.

Колледжын спортивный командыже-влакат тӱрлӧ таҥасымашлаште сеҥат. 2009 ийыште командына кир спорт дене республиканский таҥасымаште сеҥен. 2011-2012 ийлаште ече дене республиканский таҥасымаште кокымшо лийынна. Колледжыште тунемше Артур Давлетов куштылго атлетика дене Башкортостан Республикын чемпионжо лийын. Самырык спортсменна-влакым физический воспитаний вуйлатыше, ече дене таҥасымаш дене Россий спорт мастер Валерий Иванов туныктен.

2013 ий апрельыште БР Правительство кокла профессиональный образований программа почеш туныктышо, экономикын приоритетный отрасльже-влак почеш инновационный образовательный программым илышыш шыҥдарыше учреждений-влак коклаште высокоточный производство пашаеҥ ден специалист-влакым ямдылаш кугыжаныш полышым налаш конкурсым увертарен. Ме тиде конкурсышто вийнам тергаш йодмашым ончыл радамыште пуэнна, туныктышо, производственный туныктымаш мастер-влак гыч посна паша группым чумыренна. Тушко Ф.Ф. Низамов, А.Е. Иванова, С.Г. Андриянов, М.М. Гайсина, Л.К. Аспаева пуреныт. Нуно «Подготовка квалифицированных рабочих кадров, обеспечивающих реализацию технологий качественного производства сельскохозяйственной продукции в меняющихся агроклиматических условиях» тема почеш инновационный образовательный программым ямдыленыт. Конкурсын итогшо почеш, а тушто кокла профессиональный образованийым пуышо 22 учреждений вийжым терген, мемнан колледж сеҥыше-влак радамыш логалын да Башкортостан Республика Правительствын грантше дене палемдалтын. Тыге колледжлан 11 миллион утла теҥге ойыралтын.

Тиде окса дене туныктымо-лабораторный оборудованийым, тӱрлӧ программа дене методический литературым налме, туныктымо помещенийым уэмдыме, персоналын квалификацийжым кугемдыме. Программым илышыш шыҥдараш Илиш районысо «Агронас» ООО (вуйлатышыже Г.Б. Гайнетдинов), Ленин лӱмеш ял озанлык артель (Д.А. Осипов) полшеныт.

2019 ийыште колледжын коллективше «Российысе эн сай 100 ссуз» конкурсышто лауреат лийын, диплом да «Идалыкын директоржо» почетан знак дене палемдалтын. 

Тӱрлӧ пашаеҥ-влакым ямдылыме - специальность-влакым пуымо деч посна колледж социально кӱлешан пашамат шукта. Кумло ий жапыште тыште сай, тыгак тичмаш огыл ешлаште кушшо, тулык ӱдыр-рвезе-влакат тунемыныт, «неле» категорийыш пурышо-влакат лийыныт. Колледж нунылан профессийым пуымо дене серлаген огыл, чылаштымат пукшымо, воспитатлыме, чын корныш шогалтыме шотыштат тургыжланен. Мутлан, 2017 ий тӱҥалтыште колледжыште шуко икшыван ешыште кушшо 56 студент, шагал парышан да тичмаш огыл ешыште кушшо 144 студент, 29 тулык еҥ, 12 инвалид тунемыныт. 

Колледж туныктымо да социальный паша деч посна озанлык пашам шукта. Тунемме заведенийын 600 гектар мландыже уло, озанлыкыште шӱдӧ наре ушкал ден имньым, 50 утла сӧснам да моло вольык ден ютым ашнат. Колледжын чыла структурный подразделенийжат, шкеныштын посна пашаштым ыштен, ик чумыр задачым шуктат - самырык тукымым воспитатлат. 

Тыште шке пашаштым сайын палыше, йӧратыше еҥ-влак ыштат. Индеш туныктышын «Башкортостан Республикысе образованийын отличникше» лӱмжӧ уло. 2022 ийыште Башкортостан Республика Вуйлатыше Р. Хабиров производственный туныктымашын мастерже П.А. Бикмасовлан БР Правительствын «Профессийыште эн сай» дипломжым кучыктен. Колледжыште туныктышо лу еҥым Башкортостан Республикысе Образований министерствын, куд туныктышым Башкортостан Республикысе Ял озанлык министерствын Чап грамотышт дене палемдыме. К.П. Акушевалан «Башкортостан Республикысе ял озанлыкын сулло пашаеҥже», В.Т. Байбулатовлан «Башкортостан Республикысе образованийын сулло пашаеҥже» да «Башкортостан Республикысе ял озанлыкын сулло пашаеҥже» лӱм-влакым пуымо. Р.Н. Аптикаева ден В.Т. Байбулатов Россий тӱҥалтыш профессиональный образованийын почетан пашаеҥже улыт. А.Е. Иванова ден Н.А. Иксанова «Россий Федерацийысе воспитаний да просвещений пашан почетан пашаеҥже» знак дене, К.Ю. Михайлова «За трудовую доблесть» медаль дене палемдалтыныт.

Колледж 2008, 2012 ийлаште «Эн сай тӱҥалтыш профессиональный образований учреждений» семын Башкортостан Республика Правительствын дипломжым сулен. Башкортостан Республика Правительствын 2016 ийыште пуымо дипломжо нерген посна каласыман. Тушто шӧртньӧ буква-влак дене тыге возымо: «Мишкан район муниципальный районысо Мишкан агропромышленный колледж ял озанлык профессий-влаклан туныктымо шотышто эн сай профессиональный образований учреждений улеш». Тудым тачысе кечылан колледжын эн кугу наградыжлан шотлаш лиеш.

Колледжын юбилейже кечын шкенан ветеранна-влаклан шокшо деч шокшо мутым ойлена. Тыште тӱрлӧ жапыште тыгай еҥ-влак пашам ыштеныт: Константин Павлов, Зуфар Загитов, Емельян Кугубаев, Александр Русинов, Гайнамал Карамова, Павел Бикмасов, Виктор Шамуратов, Константин Кутлуметов, Алексей Саликаев, Руслан Баймулин, Юрий Гареев, Анна Егорова, Нурлыгаян Ибрагимов, Флюра Иванова, Фарзия Нуртдинова, Василий Николаев да молат.

Агроколледжын коллективше районысо предприятий да учреждений вуйлатыше-влак Р.Р. Шамсутдиновлан, А.П. Перевышинлан, Д.А. Осиповлан да молылан колледжлан материально-технически вияҥаш полшымыштлан, студент-влаклан производственный практикым эрташ йӧным ыштымыштлан, пашаш налмыштлан тау мутым ойла. 

Тачысе кечын колледж жаплан келшен толшо туныктымо заведений улеш. Туныктымо программыже сай, коллективше икоян да творческий шӱлышан, кабинет-влак чыла шотыштат туныкташ келыштаралтыныт, студент-влак келге шинчымашым погаш да пашалан тунемаш тыршат. Инвалид ӱдыр-рвезе-влаклан тунемашат чыла йӧн ышталтын.

Кызыт колледжыште кокла профессиональный образований образовательный программа почеш 400 утла еҥ тунемеш, нуным 7 тӱрлӧ профессийлан туныктат. Тышке Мишкан села да район гыч веле огыл, Бурай, Пӱрӧ, Калтаса, Караидель районла гыч тунемаш толшо-влакат улыт.

Колледжын материальный базыже пеҥгыде: спецдисциплина-влакым, чумыр образовательный предмет-влакым туныктымо посна кабинет, мастерской-влак, автодром, трактородром, тӱшкагудо, столовый, актовый зал, тунемме озанлык да моло улыт.

Тунемме заведенийым тудын шочмыж гыч 2022 ий апрель марте Россий Федерацийысе тӱҥалтыш профессиональный образованийын почетан пашаеҥже, Башкортостан Республикысе образованийын сулло пашаеҥже, Башкортостан Республикысе ял озанлык пашан сулло пашаеҥже Валерий Тимиргалиевич Байбулатов вуйлатен. Колледжым ыштымаште да вияҥдымаште тудын надырже пеш кугу. 

Жап верыште ок шого. Эллан кӱкшӧ квалификациян пашаеҥ-влак кӱлыт. Мландӱмбалне кеч-мыняр профессий лиеш, илыш палын вашталт толеш гынат, мланде пашаеҥ-влак кеч-кунамат кӱлешан лийыт. Тугеже тыгай пашаеҥ-влакым ямдылыше учреждений-влакынат кӱлешлыкышт ок йом. Мишкан селасе агропромышленный колледж лач тыгай суапле пашам ышта.