Йӱксавыш. Нимолан куанаш

Марий йылмым туныктымо программым да учебник-влакым ыштыме нерген йодыш икымше Марий погын годымат эн пӱсӧ лийын. ХХ курым тӱҥалтыште илыше марий-влакым умылаш лиеш - тунам шочмо йылме дене нимогай литература, методика, типографий лийын огытыл. Туныктышо-влакат икте-весышт дене ужын ойласен але серыш гоч гына кылым кучен кертыныт.  Кызыт туныктышо ден наука пашаеҥ-влаклан икте-весышт дене кылым кучаш компьютер, электрон почта, тӱшка кыл, марий клавиатура - чыла йӧн уло. Могай йодышым каҥашынет - жапым гына му. Туге гынат марий йылмым да литературым туныктымо программым да сай учебник-влакым ыштыше садак уке. Молан? Тиде йодышлан вашмутым «Съезды народа мари» книгаште кычал ончышым да 171-ше лаштыкыште возымо чынла чучо. Тудым кусарыде ончыктем: «За лучшие учебные пособия на родном языке должны выдаваться премии из Национального Фонда». «По вопросу о создании учебной литературы Съезд по докладу Н.М. Орлова постановил: при каждом губернском отделе Мари по народному образованию должна быть организована комиссия из компетентных лиц для работы по изданию национальной учебной литературы». Тидын нерген пӱтынь Российысе марий калыкын кокымшо погынжо годым ойленыт. Тудо Казань олаште 1918 ий 6-14 июньышто лийын. 

Кызыт кеч-могай погынымаш годым туныктышо-влакын секцийышт пашам ышта. Тушто программым да учебник-влакым ямдылыме шотышто икмыняр комиссийым ышташ да тушко кум-вич еҥ дене ойыраш гын, туныктымо книгам лукмо паша талынрак ворана ыле, очыни. Кызыт секцийыште проблемым нӧлталыт, а умбакыже паша огеш кай. Кӧлан-гынат ӱшанат, векат.