Школыш ошкылмо корнын акше

Жап эрта. Теве мыйынат ӱдырем пуйто шукерте огыл гына изи пӱтыртыш гай койын кия ыле, а тений уже 1 сентябрьлан 1-ше классыш тунемаш кая. Мыйынат моло аван семынак чон вургыжеш, вуйышто эре ик йодыш пӧрдеш: мыняр оксам ямдылыман? 

Июль тылзе шуо веле, трук телефонышто «Родительский чат» тӱшка толын лекте. Класс туныктышо мом налаш кӱлмӧ шотышто кок лаштык кужыт спискым колтыш. Ончал лектымат, адак чотрак ойгыраш тӱҥальым. 

Ондак школ формо нерген, варажым канцелярский сату шотышто мутым тарватышт. Пелашем дене машинаш шична да вургем погаш Уфаш кайышна, молан манаш гын мемнан школна Уфасе фабрик дене кылым ыштен. Тушто ме сарафаным, ош блузкым, кофтым, спорт занятийлан да тыглай йолашым, ранецым, шӱеш пижыктыме посна бантым нална. Чылаже 10 тӱжем теҥге утлам пыштен кодышна. Мӧҥгӧ пӧртылына, а чон чон олмышто огыл - эше мо кӱлешын пелыжымат налме огылыс! 

Теве пелашемым пашаш ужатышна. Ӱдырем дене коктын пазарыш тарванышна. Мый школлан мо кӱлешым ончем гын, тудо эше могай у модышым налаш лиеш манын коштеш. Мылам икте келша гын, тудлан - весе. Мый вургем кужашрак жаплан чытыже манын шонем, а тудо моторым ойыркала. Тыге кок кече почела вургемым кычална, но нимо шотым ышна му. А вара чытыш пытыш! 

Ӱдыремым коваж дек намиен кодышым да шкеже ик кечын канцелярский сатум, эрлашыжым йолчиемым наледышым, кумшо кечылан колготкым, ӱпеш пижыктыме ош бантым, тыглай резинке ден заколко-влакым, майкым, носким, моло вургемым погышым. Тыге эше 10 тӱжем теҥгем кучылтым. Да эше ача-ава комитет класслан кӱлеш арвер-влакым наледаш оксам погаш кӱлмӧ нерген шижтарыш. 

Кызыт эше пагытшат тугай, школыш коштшо йочан кӱсеныштыже телефон але кидшагатше лийшаш. Келшыше приложенийым шынден, нунын гоч икшывын кушто коштмыжым палаш лиеш. А южышт гоч мо нерген кутырымыштымат колышташ лиеш. Тыгай шагат-влак тӱрлӧ акан улыт, кужашланрак тӱсыжӧ манын, адакат сайракшым налаш тӧчет. Садлан эше 5 тӱжем теҥгем ешарена. Икманаш, эн кӱлешан арверым гына налаш кӱсеныште 25 тӱжем теҥге деч шагал огыл лийшаш. А варажым тиде спискыш шыже йолчиемым, кемым, ветровкым, упшым, пижым ешараш лиеш. 

Мыйын гын тачысе илышым ала-молан эре ожнысо дене таҥастарыме шуэш. Ме ешыште изам ден коктын кушкынна. Школыш кайыме жап лишемме годым, шорыкым ужален, ик арняжым эре изайлан, вес арняжын мылам вургемым погат ыле. Тудо пагытыште, шарнем, ик шорыкшым 2000 теҥгелан ужаленна. Нимогай кидшагат кӱлын огыл! А кызыт? Ача-ава-влак тугай кычалтылше улыт, эсогыл физкультурлан могай тӱсан футболкым налшашым кок тылзе каҥашышт: иктыжлан нарынче тӱс ок келше, весыжлан - ужарге. А ожно икшывым чара луктын колтен огытыл гын, уже сай лийын.