Элысе конкурсышто вийжым терга

Калтаса районысо Краснохолмский селаш шочын-кушшо Н.Е. Кунакбаева дене лишкыракат палыме лияш йӧн лекте. Наталья Евгеньевна чырык курым образований аланыште тырша. Удмурт кугыжаныш университетым тунем лекме деч вара шкенжын тунемме Краснохолмский селасе 2-шо школышто пионервожатыйлан ышташ тӱҥалын, географийым туныктен, вара ик жап Уфасе механико-технологический техникумышто спецдисциплина туныктышылан тыршен. А 2007-ше ий гыч Мелеуз олаште ила да пашам ышта. 

Эреак уым кычалше, шкем тӱрлӧ велым терген ончаш тыршыше кӱшыл категориян туныктышын паша лектышыжат сай. «Идалыкын туныктышыжо - 2015» конкурсын муниципальный этапыштыже Гран-прим сеҥен налын, республикыште пелефиналыш лектын, «Калык призваний - 2020» конкурсын муниципальный этапыштыже сеҥен, тудым БР Образований министерствын, районын Чап грамотышт, дипломышт да таумутан серышышт, Мелеуз район администраций вуйлатышын грантше дене палемденыт. 

Наталья Евгеньевна школыштыжо Руш географий ушемысе самырык-влакын клубыштым вуйлата, экологий отрядын пашажым виктарен шога. 

Тунемше-влаклан сай шинчымашым пуаш манын, уроклаште тӱрлӧ йӧным кучылтеш - проект да практический паша-влаклан, гугл-картылан да молылан эҥерта, тунемше-влак дене сай кылым ышташ тырша. Икшывылан тунемаш келша гын, нунат туныктышышт деч вараш огыт код - географий дене тӱрлӧ кӱкшытан олимпиадылаште, конкурс ден акцийлаште сеҥыше да призер радамыш логалыт. 

А эн чотшо Наталья Евгеньевналан йоча туризмым вияҥдаш келша. Ий еда, келшыше маршрутым ойырен, «Мыйын Россием» федеральный программа кышкарыште ӱдыр-рвезе-влакым Уфаш, Казаньыш, элнан моло  олалашкыже экскурсий дене кондыштара, йӧн улмо годым Европысо эллашкат миеныт. 

Н. Кунакбаева шке пашаже, экскурсий-влак нерген «Вконтакте» соцкылысе лаштыкыштыже оҥайын радамлен каласкала, мемнан кундемна, илыме вер-шӧржӧ денат палдара да ятыр фотосӱретым, видеороликым ончыктылеш. Шукерте огыл тудо «Россия - страна возможностей» платформышто эртарыме «ТопБлог» элысе проектыш ушнен да 32 тӱжем участник коклаште пелефиналыш лектын. 2000 участник кокла гыч 150-жым август тӱҥалтыште Татарстан Республикысе Иннополис олаш кум тема дене эртарыме форумыш ӱжыныт, нунылан шуко пайдале вашлиймашым да каҥашымашым эртареныт. Мемнан землячкына «Социальный кыл гоч илыме верын брендшым вияҥдымаш» форумышто шинчымашыжым пойдарен. «ТопБлог» эше мучашлалтын огыл,  ик жап гыч финал лийшаш.   

Н.Е. Кунакбаева кызыт вес кӱкшытым сеҥынеже. «Классная тема» телепроектыш логалаш манын, 10 август марте йодмашым колтен, анкетированийым, шке предметше дене тестированийым эртен да географий урокышто кучылтмо пайдале темлымашан видеовизиткым возен шуктен.

Тений ты телепроектыш математикым, химийым, биологийым, географийым, историйым, физикым, руш йылмым да литературым туныктышо-влак ушнен кертыныт. Телеканал «Классная тема» шоум Россий Президент Владимир Путинын да РФ Просвещений министерствын темлымышт дене эртара. 1 сентябрьлан эксперт-влак 35 пелефиналистым, а вара нунын кокла гыч финаллан 7 туныктышым ойырен налшаш улыт.   

«Проектыш ушнымаш - шкем терген ончаш, уым пален налаш, коллега-влак дене кылым ышташ, ваш-ваш паша опыт дене палдараш пеш сай йӧн», - манеш Н. Кунакбаева. Шочмо йылме шотышто мутым тарватымек, «Мый удмурт улам, йочам годым чӱчкыдын кочам-ковам дек Кугу Качакыш коштынам, садлан шочмо йылмемымат палем. Шке калыкем дене кугешнем» манын каласыш.

Еш архив гыч налме фото-влак.