Образований сферын экспертше-влак ий еда тунемме заведений-влакын рейтингыштым ямдылат. Мутлан, Университет-влакын национальный рейтингыштышт 358 кӱшыл тунемме заведений коклаште УГНТУ 41-ше, БашГУ 71-ше, УГАТУ 78-ше да БГМУ 97-ше верлам налыныт. Педагогика ден аграрный университет-влак 130-шо да 144-ше верлам айлат. Элысе университет-влакын рейтингыштышт ончыл верлаш М.В. Ломоносов лӱмеш Москвасе кугыжаныш университет, «МИФИ» Национальный исследовательский ядерный университет да Москвасе физико-технический институт (кугыжаныш университет) лектыныт. Престижный федерал вузлаште бюджет верлаш отличник да мер илышыште шкем чолган ончыктышо ӱдыр-рвезе-влакланат тунемаш пураш куштылго огыл. А тунеммылан эше оксам тӱлыман гын, тиде еш бюджетлан изи огыл нелытым ешара.
Башкортостаныште сай тунемше студент-влакын ешартыш выплатым налаш правашт уло. Мутлан, ЕГЭ-м шӱдӧ баллан сдатлыше да Тӱнямбал кӱкшытан Евразийский научно-образовательный рӱдерын участникшылан шотлалтше вузлаш (кызыт тиде БашГУ да УГАТУ) тунемаш пурышо студент-влак 150 тӱжем теҥге единовременный выплатым налыт. Башкортостан Вуйлык Радий Хабиров тидын нерген пунчалым пеҥгыдемден. Экзаменыште кӱкшӧ баллым погышо-влак тыгак тунемме идалык мучко кугурак стипендийым налын кертыт. Тудын кугытшо кажне вузышто ойыртемалтеш - 10 гыч 25 тӱжем теҥге марте шуэш.
«Башкортостан Республика» Издательский пӧрт гыч колтымо материал негызеш Л. ШАВАЛИЕВА ямдылен.