12 майыште мемнан элыште Экологический образованийын кечыжым палемдат. Тиде кечын ола ден посёлкылаште пӱртӱсым аралыме шотышто акций, выставка, конференций, йоча творчество конкурс-влакым эртарат. Пашаеҥ-влак эҥер, ер сер, парк-влакым эрыкташ лектыт.
Российыште экологий дене йочасадыште палыме лийыт да шинчымашым школышто, вузышто, тудын деч варат шуят. Экологий шинчымашым калык коклаш шараш СМИ, музей, библиотека, спорт да туризм организаций, пӱртӱсым аралыше учреждений-влакын проектышт полшат. Тиде чыла сай, очыни. Но шӱдӧ гана колмешке, ик гана шке ужаш да кид дене ыштен ончаш гын, ала-мыняр пачаш пайдале, шонем.
Совет образований годым ӱстембаке кинде кушеч толмым кажне школьник умылтарен кертын. Кызытат палат манаш огеш лий. Тунам кугурак ийготан тунемше-влак шошо еда посадкым шындаш коштыныт гын, кызыт нунын олмеш тидым волонтёр да тӱрлӧ организаций пашаеҥ-влак ыштат. Школьник-влаклан кид вий дене пашам ышташ «ойӧрӧ».
Икмыняр ий ончыч школыш кайышаш йоча-влак деч кум сӱрет почеш (нӧшмӧ, кечшудо пеледыш, ӱй) кушкыл ӱйын толмо корныжым ончыкташ «Мо ончыч лийын, мо вара?» манын йодымат, группа гыч икмыняр ӱдыр-рвезе веле чын ончыктыш. Изирак йоча-влак черепаха ден попугайым «мӧҥгысӧ вольык» радамыш пуртен колтат. Тиде мо нерген ойла? Икшыве-влак пӱртӱс деч торлат. Кузе ӱстембаке кочкыш толеш, кушеч вургем ышталтеш, нуно шагал палат. Тугеже, ончыкылык пашаеҥ-влаклан кочкыш-йӱышым, вургемым ыштыме годым пӱртӱсым арален кучылтмо нерген пашаште пален налман але угыч тунемман лиеш. Теве тыгайрак, мыйын шонымаште, кызытсе экологический образований: шуко ойлена, да шагал ыштена. Мемнан элыште тудым вияҥден колташ тыршаш да тыршаш кӱлеш, тыгодым ача-ава-влакат полшышаш улыт.
Фото: vk.com/ecodelai_rb