Сценыште - педагог-влак

Калыклан ончаш темлыме номер-влак: куштымаш, мурымаш, семӱзгар дене шоктымаш, театр постановко-влак - пеш оҥай да сӧрал ыльыч. Педагог-влакын мастарлыкыштлан куанаш да нуным мокталташ гына кодеш - конкурслан чот тыршен ямдылалтыныт. Шуко номерже профессионал-влакын деч нимынярат ойыртемалтын огыл. Погынышо калык нуным пеш шокшын вашлие. 

22-шо «Колокольчик» йочасад гыч смотр-конкурсышто хореографий ансамбль да «Запеканки» КВН команда выступатлышт. Мемнан ансамбльна тений «Марий ӱдыр куштымашым» ончаш темлыш. Куштымашна пеш сӧрал лектын - вургем денат, сценыште лывыргын тарванылме денат кумылым савырен. Тиде мотор номерым мыланна хореограф-влак  А.Р. Заляева да В.Ф. Паршакова ямдылаш полшышт. 

Жюрин еҥже-влаклан ятыр номер кокла гыч эн сайжым ойыраш куштылго огыл ыле дыр. Иктешлыме деч вара ансамбльна «Марий ӱдыр куштымаш» дене 1-ше степенян лауреат лие да гала-концертыште выступатлаш ӱшаным сулыш. «Запеканка» КВН командынамат 3-шо степенян лауреатын дипломжо дене палемдышт. Мо оҥайже, «Хореографий» номинацийыште оласе 2-шо школын да 34-ше йочасадын марла куштымашыштымат икымше вер дене палемденыт.