Арня пайдалын эртыш

Изирак класслаште тунемше-влак Корней Чуковскийын шочмо кечыже лӱмеш «В гостях у дедушки Корнея» литератур путешествийыш «мийышт». Йомакысе героймыт дене пырля йомакыштат уна лийыч. Шинчымашым тергаш оҥай викториным эртарышна. Книга выставкым ямдылашат ышна мондо. Тиде кечын йоча-влакын шинчымашышт да усталыкышт раш палдырнышт. Кокымшо кечыжым школ библиотекыште эртарышна. Тушко шымше классын тунемшыже-влакым ӱжна. Тиде кечыжым профессийлан пӧлеклышна, лӱмжат оҥай ыле - «У илышыште - у профессий». Йоча-влак ончыкыжым могай профессий эн кӱлешан лиймым пален нальыч. Кумшо кечыжлан кандашымше классыште тунемше-влак Е.М. Асылбаева дене дене Пётр I жапысе илышым шымлышт. Библиотека пашаеҥ руш императорын илышыж дене палдарыш. Йоча-влакын шинчымашыштым пеҥгыдемдаш викториным эртарышна. Нылымше кечым фольклорлан лӱмлымӧ ыле. Тушко кудымшо классыште тунемше-влак погынышт. Нуно туштым туштышт, писын ойлаш тунемыч, калыкмутым шарналтышт. Вашлиймашым марий калык модыш дене мучашлышт. Пытартыш кечым йомакысе герой-влакын парадыштлан пӧлеклышна. Йоча-влак вургемым да рольым уло кумылын ямдылышт. 

Ялысе библиотека пашаеҥ Е.М. Асылбаевалан да школ библиотекыште тыршыше Г.Н. Ахмадуллиналан кугу таум каласена. Тыгай вашлиймаш-влак йоча-влакым книгам лудаш шӱмаҥдат.