Тек сай книга ӱшанле йолташ лиеш

Сай книга, произведений изи ньоган нӧргӧ уш-акылжым чын корно дене виктара, шӱм-чонышкыжо чын айдеме лияш полшышо умылымашым шыҥдара, койыш-шоктышыжым пеҥгыдемда, тӱняужмашыжым кумдаҥда. Сай, кунам ялыште, школышто библиотека уло, да ава-ача, туныктышо-влак тидым сайын умылат, тудын дене пайдаланат.  

Йоча книган кечыже вашеш Краснокам районысо Йывангасола библиотекыште тематический арня эртен. Тудым йоча литературлан пӧлекленыт. Теве 1-ше классыште тунемше йоча-влак туныктышышт А.Б. Нуриахметова дене ялысе библиотекыш уло классге миеныт. Нуным библиотека пашаеҥ Э.В. Гаврилова самырык тукымлан возымо книга фонд дене палдарен. Изи ӱдыр-рвезе-влакланат оҥай герой, сюжет, йомак, тӱрлӧ чиян книга тӱняш логалаш оҥай лийын. Йоча-шамыч литератур викториныште вийыштым тергеныт, туштылан вашмутым кычалыныт, библиотекыште шкем кузе кучымо правил дене палыме лийыныт, тӱрлӧ йоча энциклопедийым, газет ден журналым лаштыкленыт, сылнымутан книга выставкым онченыт.