«Калык ойпого» лэпбук

Тыгай яйле-йӧнан книгам туныктымо-воспитатлыме пашаште темым иктешлыме годым кучылташ пайдале. Тудым туныктышо тунемше-влак дене, тунемше ача-аваж дене пырля, тунемше, йолташыже-влак дене погынен, але шке ямдылен кертеш. Ямде лэпбукым да тудлан шаблоным Интернетыште темлыше-влак шагал огытыл. Могай тема кӱлеш - чылажат уло.  Но марий йӱла, йылме, историй,  культура нерген шке огына ыште гын, нигӧ мыланна кидышкына кучыктен огеш пу. 

Айста «Калык ойпого» темылан проста лэпбукым ыштен ончена. Эн ончыч А3 форматан ватманым але картоным налына. Тудым шола да пурла велже гыч покшеке пӱгаш кӱлеш. Кок могырыш почылтман книга лектеш. Ынде кӧргыжым сӧрастарена. Покшелне йыргешке «барабан» пӧрдеш. Тудым кок полдышым: иктыжым лэпбукын тупынь, весыжым мелын велкыже пыштен ушен ургаш лиеш. «Барабанеш» мут-влак возалтыныт: калыкмут, тушто, шотлеммут, йомак, калык пале, ойӧрӧ, муро. Тунемше барабаным пӱтыралеш - мут почылтеш, тудлан йоча примерым конда. Пурла велне кок велыш почылтман изи лаштык-влакым пижыктена, «Калыкмутым чын ушо» манын лӱмдена. Ик велныже калыкмутын тӱҥалтышыже, вес велне - мучашыже. Йоча калыкмутым чын ушышаш. Ӱлнырак «Туштым  туштем - палыза» конвертыште тушто-влак да нунын вашмут-сӱретышт «илат». Шола велне кӱшнӧ петыралтшан-почылтшан пеледыш лиеш. «Кунам тыгай мурым мурат?» пашам пуэна. Ӱлнырак калык ойпогын определенийже але «ойпого» мутлан синквейным шонаш темлена. Синквейн - вич строкан почеламут. Икымше строка - ик лӱм мут гыч шогышо почеламутын лӱмжӧ, темыже. Кокымшо - темым рашемдыше кок пале мут. Кумшо строка - кум глагол. Нылымше - ик предложений. Визымше строка - ик мут-иктешлымаш, икымше строкалан синоним. Мутлан, 

     Ойпого

Уста, ушан

Туныкта, шоныкта, каныкта

Кугезына-влак деч 

     ушан-шотан ой толын.

Фольклор.

А те могай темылан лэпбукым темледа? Ыштен ончыза, мыланнат ончыкташ ида мондо.