Интерактивный лабораторийым почаш шонена

- Кристина, могай амал тыйым проектым ямдылаш таратен?

- Кызытсе саманыште тунемше-влаклан шанче пашашке ушнаш тӱрлӧ оҥай интерактивный программе-влак улыт. А молан ме, Ташкиново селасе тунемше-влак, тыгай йӧным огына кучылт? Тиде йодыш вуйыштем ятыр пӧрдын. Шонымашем нерген пырля тунемме йолташем-влаклан каласкалышым. Тыге ме «Это интересно» интерактивный лабораторий нерген материалым кычалаш тӱҥална. Вара школ директор Р.М. Бурханова мемнам бюджетирований проект дене палдарыш, тудо шонымашна дене келшен тольо. 

- Проект паша куштылго огыл. Кӧ тыланет полшен але шкетын тыршенат?

- Чын, тыгай проектым шкетын ямдылаш огеш лий. Тыште сай команде кӱлеш. 10-шо классыште тунемше йолташем-влак дене пырля тыршенна. Тыгак куратор семын Р.М. Бурханова пашанам чын корно дене виктарен шоген.

- Мо тыгай интерактивный лабораторий?

- Чылажым мут дене умылтараш ок лий - тидым ужаш кӱлеш. Кӱчыкын каласаш гын, тиде естественнонаучный предмет-влакым тунеммаште кучылташ йӧрышӧ интерактивный панель-влак да моло тӱрлӧ виртуальный технологий дене пайдаланыме  оборудований - икманаш, опыт-влакым эртараш, шанче тӱням шымлаш йӧнештарыме пӧлем, тудо кугурак класслаште тунемше-влаклан веле огыл, изи ньога-влакланат келшен толеш. 

- Командым вуйлатыше семын, проектым ямдылыме годым могай нелылыкым шижынат?

- Вуйлатыше лияш тынар неле манын шонен омыл (шыргыжеш). Кажныже шке семынже шонкала, шке темлымашыжым пашашке шыҥдарынеже. Чыла тидын кокла гыч сайжым ойырен налын, иктыш ушен, кӱкшӧ лектышыш шуман. Вара проектым аралыман. Тидыже кугу аудиторийыште эртыш, чыла тунемше да туныктышо-влак эскерышт. Школышто чылаже кандаш проект ыле, кажныже шке семынже оҥай. Тидым умылет, но шкендын командет верч шогет. Сценыште эше икмыняр опытым ончыктышым. Йӱклымаш почеш мемнан интерактивный лабораторий нерген ямдылыме проектна школышто сеҥышыш лекте.

- Кристина, чолга командет умбакыжат тыгаяк тыршышан лийын кодшо, лабораторий дене кылдалтше тӱҥалме пашадам мучашке шуктыза.