Кок шӧртньӧ медаль ешаралтын

Тудо кечылаштак Мелеузысо шуко профилян колледжыште самырык мӱкшызӧ-влак шке шинчымашыштым аклен кертыныт. Мемнан колледжын икымше курсыштыжо тунемше Александр Айтугановлан (вуйлатышыже К.Ю. Михайлова) омартам телылан ямдылымым да мӱкшлан кочкышым оптымым, мӱйым кушеч погымым да тудын физический свойствылажым рашемден моштымым, мӱкшын чержым палымым, эмлен моштымым да моло мастарлыкым ончыкташ логалын. Тале кучедалмаште Александр чемпионатыште «Мӱкш ончымо паша» компетенций дене шӧртньӧ медальым сулен.

Мишкан агропромышленный колледжын студентше-влак тыгай таҥасымашлаште ончычат сеҥеныт. 2021-ше ий событий-влаклан поян да мыланна сай лектышан лие. «Самырык профессионал-влак» VI региональный чемпионатыште кок тунемшына сеҥышыш лекте. Кумшо курсышто тунемше Вадим Валеев «Кермыч оптымаш» конкурсышто 2-шо верым налын, кумшо курсышто тунемше Вадим Муртазин мӱкш ончымо пашаште сеҥышыш лектын да Национальный чемпионатыште республикын чапшым арален, Российын чемпионжо лийын.

6 декабрьыште Мишкан агропромышленный колледжыште повар паша да кермыч оптымаш дене кок у мастерскойым почыч. Республика Правительствын, Наука да образований министерствын полшымышт дене колледжын студентше-влак кызытсе жаплан келыштарен тӱзымӧ мастерскойлаште шке специальность дене келге шинчымашым поген, у производственный технологий-влаклан тунемын кертыт. Тыште нуно ончыкыжым производствыш вигак кӱкшӧ квалификациян специалист лийын мияш ямдылалтыт, паша рынкыште кӱлешан да конкуренцийым чытен кертшашлык шинчымашым да моштымашым погат.