Школыш кошташ але суртышто тунемаш?

Л. Калиева, Нефтекамск ола: Тыгай йӧныш куснашак маныт гын, морально да материально ямде улам. Рабочий программе, календарный планирований, моло документым пеҥгыдемдыме. Мыланна, туныктышо-влаклан, тӱрлӧ вебинар, «йыргешке» ӱстел-влак эртаралтыт - полыш уло. 1-ше классым дистанционно мучашлышна. 2-шо классыш тунемше-влак сай шинчымаш дене тольыч, тидыже куандарыш.Тӱҥалтыш классыште ава-ача деч посна нигузе ок лий. Мӧҥгӧ пашам ончен лекташ, уроклан ямдылалтмым тергаш кӱлеш. Но теве «мӧҥгешла связь» манмет, мӧҥгӧ пашам тергымаш кечыгут але икмыняр кече дене шуйнат.
А. Нуриахметова, Краснокам район: Каникулым шуйымаш пеш сай огыл. Йоча-влак, руш манмыла, колеяшке пурен шуктышт гына… Трук тунемме процесс уэш кӱрылтеш. Пӧртыштӧ тунем шинчымаш кажне йочалан икгай ок эрте: тунемаш шонышыжо тунемеш, укеже... Но тунемшыжат тыгай годым пеҥгыде шинчымашым ок нал. Ялыште, мутлан, йоча-влаклан технический оборудований шотышто нелылык шижалтеш. Шуко икшыван ешыште, ик ешыштак тунемше ден туныктышо улыт гын, тыгак суртышто студент тунемеш гын, дистанционный йӧн дене тунемше йоча тыгодым шеҥгеланрак кодеш. Шошым тыгай формат дене тунемме годым ситыдымаш-влак раш палдырнышт. Икманаш, тунемше ден туныктышын, икте-весым ужын, вашлийын тунеммашым нимогай техника вашталтен ок керт, южгунам тунемаш полша гын веле. Конешне, тазалык ончыл верыште лийшаш. Туге гынат жапыштыже тунемман.
Д. Маникаев, Нефтекамск ола: Дистанционно тунемме годым йоча-влак материалым умылен огыт шукто. Физкультур урокышто йоча заданийым ок умыло гын, туныктышо воктекыже мия да индивидуально умылтара. Кызыт урок жапым кӱчыкемдышт (35 минут шуйнат.), тиде шагал. Урокышто туныктышо кӧ кузе пашам ыштымым ужеш, чыла йоча шинча ончылно. Дистант-тунеммаште йоча, ала телефоным кучен шинчын, Интернет гыч вашмутым пуэда? Тугай случай-влакат лиедат, кунам «двоечник-влак» «отличникыш» савырнаш тӱҥальыч. Тыге лийын ок керт. Йоча-влак шкештат «Ме материалым умылен огына шукто» маныт. Физкультурышто зарядкым, приседанийым, отжиманийым, моло упражненийым онлайн йӧн дене эртарена. Мо сайже, теорий дене шуко материалым, олимпиаде йодыш-влакым пуаш лиеш. Но физкультур - тиде эн ондак физический активность. Вес могырым, коронавирус дене 32-38 ияш-влакат черланат. Ситуаций неле, садлан дистанционно тунеммым чыталташат лиеш.
Л. Килинбаева, Мишкан села: Школыш миен, йоча-влакым ӧндалын, шинчашкышт ончен, темым умылтараш, кажныжын тетрадьшым почын ончалаш - тиде кугу куан. Дистанционно тунеммашыш куснымаш кажне туныктышылан ятыр нелылыкым ешарыш. Йочан пашажым тергаш шуко жап кӱлеш, йӱд марте шинчалтеш. Кажныжын пашажым, принтер гоч луктын, йоҥылышыжым тергыман, отметкым вигак электрон журналыш шындыман, кечыгут телефон да компьютер дене кылым кучыман. Урокым эртарыме годым южо тунемше Интернетыш пурен огыл, але урок покшелне онлайн урок гыч «лектын возын». Тыгеат лиеш. Тыгайжылан темым посна, телефон гоч, умылтарыме. Южо ешын Интернет кыл йомын гын, нунылан заданийым, лаштыкыш луктын, мӧҥгыш намиен кодымо.Шыже каникулым ик арнялан шуйымат кышажым кода. Тунемше-влак эртыме темым ынышт мондо манын, кажне эрдене WhatsApp кыл полшымо дене заданий-влакым колтылам. Кастене пашаштым тергем.
Е. Тимирьянова, логопед, Нефтекамск ола: Дистанционно тунемме годым йоча-влаклан шуктышаш заданий семын кейс-влакым колтылам. Нуно мылам электронно вашештышаш улыт, но шукыж годым тыге миен ок лек. Тыгай йӧн дене тунемме годым паша лектыш ок кой. Мыйым йоча-влак дене маскым чиен пашам ышташ йодыт. Кузе мый нунын дене маске дене ыштен кертам? Йоча мыйын пӱемым, умшамым, йылмемым ок уж. Тунемше тидым мыйым да шкенжым воштончышыш ончен шуктышаш. Кунам тудо заданийым мыйын почешем ышта, тунам лектышат сай. А дистанционный форматыште тиде йӧнан огыл. Йоча мыйым мӱндырчын сайын ок уж. Южо икшывын телефонжо але компьютержат сай качестван огытыл. Тусо изображений начарынрак коеш гын, йоча логопедым умылен ок шукто.

Е. Мусагитова, Благовещенск ола: Кызытсе жапыште поснак йоча-влаклан йӧсӧ. Умылен кертшыже тунемеш, молыжо жапым веле арам эртара. Кече мучко, СанПиН йодмо почеш шагалрак гынат, компьютер воктене шинчымаш йочалан пайдам ок кондо. Тиде жапыште йочалан эҥертыш лийман, полшыман. Каникулым шуйымаш сай, конешне, но тунемме программым кузе эртен шуктыман? Тиде туныктышылан да тунемшылан программым умбакыже эрташ нелылыкым конда.
С. Иликбаева, Нефтекамск ола: Каникулым шуйымым сайын умылем - тудо чер лӱдыкшым иземда. Дистанционно туныктымаш изишак тургыжландара. Йоча чыла темым умылен ок шукто, вет шкевуя тунемашат шуко заданийым пуат. Кунам ава-ача пашаште, йоча пӧртышто кузе тунемеш, мом ышта - эскерен шукташ ок лий. Южгунам техника чаракым ышта. Мыйын шонымаште, икшывым эре эскерен, терген шогет, да йоча шкежат ответственностьым шижеш гын, тунемаш лиеш. А школышто тунеммым, йолташ-влак дене вашлийын мутланымым нимо вашталтен ок сеҥе.
И. Сайсанова, Бирск ола: Дистанционно тунеммаш пешак сай огыл. Йоча кече мучко суртышто петыралт шинча.