Все новости

Тунемме идалык мучашке лишемеш

Тӱня мучко коронавирус пандемий шарлымылан кӧра пытартыш жапыште школыш коштшо ӱдыр-рвезе-влак дистанционно тунемыт. Май мучаште чылан кеҥеж канышыш лекшаш, выпускной класслаште тунемше-влак иктешлыше экзаменым кучышаш улыт. Но тений, векат, тунемме идалык мучаш моло ийласе деч ойыртемалтше лиеш.

Шукерте огыл элысе просвещений министерство 2019/2020 тунемме идалыкым кунам мучашлыме шотышто регионлаш темлымашым колтен, воза «Российский газет». Тений 1-8 класс-влакым 15/16 майыштак (арняш вич але куд кече тунеммым шотыш налын) канаш колташ лиеш. 10-шо класс-влак тунемме программым 29/30 май марте мучашлышаш, а 9-ше, 11-ше класс-влак 5 июнь марте тунем лекшаш улыт.
«Шыжым тунемше-влак школышто тунемаш тӱҥалыт манын ӱшанена.
У тунемме идалыкланат ӱдыр-рвезе-влак палемдыме программа деч ынышт кораҥ, уто нелыт ынже лий манын ямдылалтына», - рашемден просвещений министр Сергей Кравцов.
Тыгодым кажне кундем тунемме идалыкым кунам мучашлыме шотышто шке пунчалжым луктеш. Мутлан, Хабаровский крайыште тунемше-влакым апрель кыдалнак канаш колтеныт. Москвасе тунемше-влаклан идалыкым иктешлыше отметкым 15 майыште луктыт. Тулеч вара онлайн-консультаций шотан урок-влакым эртараш тӱҥалыт. Икшыве-влак тушко шке кумылын ушнен кертыт, но тыгодым нунылан мӧҥгӧ пашам огыт пу, отметкым огыт шынде. 9-ше да 11-ше класслаште тунемше-влак 18-29 май кечылаште ОГЭ-лан да ЕГЭ-лан дистанционно ямдылалташ тӱҥалыт.
А экзамен-влак шотышто мом ойлат? ЕГЭ-м тугак эртарат. Тудым 800 тӱжем ӱдыр-рвезе возаш шона. «ЕГЭ деч посна вузыш тунемаш налаш огеш лий. Кызыт экзамен-влакым 8 июнь гыч тӱҥалаш шонена, - каласен Сергей Кравцов. - Но, кӧ пала, ала 12 май деч вара жапшым вашталташат логалеш. Ме эн ончычак тунемше-влакын тазалыкышт нерген шонышаш да экзаменымат тунам эртарышаш улына, кунам чынжымак лӱдыкшӧ чакна».
Индешымше класс тунемше-влаклан кызытеш ОГЭ-м кок обязательный предмет - руш йылме да математика дене гына сдатлыкташ шонат. Тыгак, ОГЭ-м сдатлыде, улшо отметкыштым иктешлыме негызеш аттестатым пуымо йодышымат каҥашат.
Редакцийын архивше гыч налме фото.
Читайте нас в