Изиеҥлан - каныш, кугыеҥлан - паша але Туныктышым шошо каныш годым мо тургыжландара?

Тыгайрак шонымаш дене эртыш мемнан школышто туныктышо-влакын черетан педсоветышт. Йоча-влак шошо каникулыш каеныт. Школ пустаҥын, нимогай йӱк-йӱан ок шокто. Лач кугыеҥ-влак гына, шке паша верышкышт миен, кӱлешан сомылышт дене шогылтыт. Южо еҥже туныктышо-влак каникул жапыште ласкан гына каналтат манын шона дыр. Йӱк-йӱан деч вуй кана гынат, тунамак вес тӱрлӧ шоныш дене аҥырга, манаш лиеш.

Тений тӱня мучко коронавирус инфекций шарлымылан кӧра йоча-влакым, ик жап школыш намийыде, дистанционный йӧн дене туныкташ логалеш. Тыгай пашам сайын шукташлан туныктышо-влак ондак шке тунемшаш улыт, а тунемме курс-влак лач каныш жапыште лийыт. Шошо каникул деч вара туныктышо-влак урокыштым компьютер полшымо дене эртараш тӱҥалыт. Илыш ончык кая. Можыч, тыгай йӧн иктаж-кӧлан келшен толеш, да ончыкыжым школ-влакат огыт лий, вет мӧҥгыштӧ туныктымо нергенат шуко ойленыт ыле. Вес могырым, йоча эре мӧҥгыштыжӧ гына лиеш гын, ача-авалан «паша шукемеш»: икшывыштын тунеммыжым эскераш да текшыраш верештеш. Тыгодым кугыеҥ-влакланат компьютерым сайын палыман лиеш. Телевизор воктене кужу жап от шинчылт: йоча ача-аван мом ыштымыжым ужеш-колеш да тудын гаяк ыштылаш тӱҥалеш.

Шошо каныш годым вӱдшор тӱҥалеш. Тыштат кугыеҥ-влаклан тӱткӧ лийман: йоча эҥер воктек ынже мий, йӱштӧ йогын вӱдыш пурен ынже кай манын эскерыман. Икшывын тазалыкше ынже начарем манын, режим почеш илаш кумылаҥдыман. Кужу каникул кече пайдалын эртыже манын, библиотека нергенат мондыман огыл. Тушко книгалан мияш корным ончыктыман. Изиракше дене пырля шке миен, книгам налман да лудаш-ончаш таратыман. Йӧра эше ача-ава-влаклан клуб пашаеҥ-влак полшен шогат, ты кечылаште икшывылан тӱрлӧ мероприятийым эртарат. Ялысе фельдшерланат эре ямде лийман: йочалан полшаш ӱжыт гын, писын гына мийыман. Эше, иктаж туткар лийын ынже кай манын, ӱдыр-рвезе-влаклан асфальт корнышто велосипед дене кошташ лӱдыкшӧ улмым умыландарыман. Туге лектеш: йочалан каникул каналташ пуалтеш, кугыеҥ-влаклан - нуным кок пачаш тӱткынрак ончаш да эскераш…

А ме, туныктышо-влак, педсовет деч вара, мушкышым кучен, ведраш дезинфицироватлыше вартышан вӱдым пыштен, шкенан класснам, коридорлам мушкын лекна да мӧҥгышкына у шонымаш-влак дене ошкылна.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».