Шонымашке шуаш тыршыман

Шукерте огыл Ӱлыл Качмаш кыдалаш школын тунемшыже-влак школнан выпускникше, кызыт А.И. Прошляков лӱмеш Тюменьысе высший военно-инженерный командный училищыште кокымшо курсышто тунемше Е.Г. Исадыков дене вашлийыч.

Мемнан школна кугу огыл гынат, ынде кумшо выпускникна офицер-десантниклан тунемеш. Капитан Игорь Кугубаев Псков олаште служитла, Михаил Пакриев тений училищым тунем пытара. Нуно коктынат Кӧкыш ял гыч улыт.

Вашлиймаш пеш оҥайын да пайдалын эртыш. Евгений армийыште служитлымыже, шке училищыже нерген каласкалыш. Шуко фотосӱретым, видеом ончыктыльо - тидыже тунемше-влаклан поснак келшыш.

Женя 2015 ийыште школым тунем лекме деч вара Нефтекамск оласе машиностроительный колледжыш электриклан тунемаш пурен. Ик ий гыч тудым Россий армий радамыш служитлаш налыныт. Службыжо Подмосковьеште общевойсковой межкинологический рӱдерыште тӱҥалын. Вупи лӱман немыч овчарке кум тылзылан тудын эн сай йолташышкыже савырнен.

«Учебка» деч вара Евгенийым ВДВ-н Омскысо 242-шо учебный рӱдерышкыже колтеныт.

«Куанлан мучаш лийын огыл, вет мый тӱҥалтыш классла гычак ВДВ-ште служитлаш шоненам да тидлан ямдылалтынам, - каласкалыш Женя. - Частьын командованийже тидым ужын да тӱрлӧ войска-влак коклаште эртарыме таҥасымашлан ямдылалташ шӱден. Тудо жаплан Рекс лӱман немыч овчарке эн сай йолташыш савырнен ыле. Таҥасымашлан ямдылалтме нерген ик-кок шомак дене гына ойлен пытараш огеш лий, вет ме чемпион лӱмым сеҥен налынна. Тулеч вара майыште Псков олаште ВДВ часть-влак коклаште эртышаш таҥасымашлан ямдылалташ кӱлын. Конешне, элнан сборныйышкыжо логапме шуын, а тидлан таҥасымашын призержо лияш кӱлын. Ме Рекс дене коктын тидым ыштен кертна. «Аралыме караул служба» дрессировкышто кокымшо верым нална, чаракым эртымаште кумшо лийна. Тыге «Ӱшанле йолташ» тӱнямбал армий модмашлан ямдылалтме у йыжыҥ тӱҥалын. Модмаш 23 июньышто тӱҥалшаш ыле. Приказ почеш мыланем армий радам гыч 15 июньышто каяш кӱлын. Мый тудо ийынак военный училищыш тунемаш пураш шоненам. Мыйым командир шкеж деке ӱжыктен да эше ик жап служитлаш кӱлеш манын каласен. Тиде таҥасымаште ме кумшо верым нална. Тыге мый экзаменым сдаватлаш вараш кодым. Армий гыч пӧртылмек, Кутерем селасе 14-ше пожарный частьыш пашаш пурышым. Пашадар начар лийын огыл, но офицер-десантник лияш шонымашем шукташак тыршенам. Тунам, тунемаш пурымем годым, математике дене профиль ЕГЭ-м сдаватлаш кӱлын. Тау туныктышем-влаклан, нимогай ямдылалтмаш деч посна икганаштак экзаменым сайын кучышым да военный училищыш тунемаш пурышым. Кызыт кокымшо курсын икымше сессийжым сдаватлен пытарышым. Шым гана парашют дене тӧрштенам. Тӱҥ шотышто АН-2 ден МИ-8 гыч тӧрштылына.

Тыге вот, рвезе-шамыч, нимо дечат лӱдаш ок кӱл, шке шонымашке шуаш тыршыман».

Снимкыште: Школышто тунемше-влак дене вашлийме годым. Авторын фотожо-влак.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».