21 февраль - Шочмо йылмын тӱнямбал кечыже

Тиде кечым мландӱмбалне кумдан пайремлат. Тÿняште куд тÿжем наре йылме уло. Нуно тÿрлö семын йоҥгалтыт, мут поянлыкыштат икгай огыл. Нине йылмыла дене мутланыше-влакын чотыштат тӱрлӧ. Шагал чотан калык-влакын шочмо йылмышт ынже йом манын, тÿнямбалсе ЮНЕСКО организаций чот тырша. Мемнан элыште кажне калыкын шке шочмо йылмыжым тунемаш праваже уло. Нефтекамск олаштына, тÿрлö калык шкенжын йылмыжым да культурыжым арален кодыжо манын, национальный рӱдер тӱрлӧ пашам шуктен шога.Мемнан кудымшо школышто марий йылме кружокыш коштшо йочана-влак шочмо йылмыштым тыршен тунемыт. Шке шочмо йылмым аклаш, шинчымашым погаш ӱдыр-рвезе-влакым лÿмлö поэт-писатель-влакын шулдыран ойыштат кумылаҥден шогат. Эн тале йылмызе В.М. Васильев тыге возен: «Йылме еҥын кö улмыжым ончыкта, йылме деч посна айдеме ок лий», а марий калык поэт Миклай Казаков «Шочмо йылмын вийже, сылнылыкше аванан шöржö дене пырля толыт. Кугу лиймекет, кеч-кушто иле, кеч-могай йылме дене ойло, но первый мутым, мурым нигунамат ит мондо, тыйын илыш йолташет лийышт» манын возен. Ме тыгай келшыше ой-влакым йочан ушышкыжо шыҥдараш тыршена. Шочмо йылме полшымо дене мом каласаш шонымыштым изирак заметкылаштышт лудын лекташ темлем.

Олег Ямиев:

Мыйын шочмо-кушмо Пошкырт кундемем мыланем эн мотор, эн лишыл да шерге. Тыште ынде шуко курым тÿрлö калык-влак ик еш гай икте-весыштлан полшен да келшен илат. Нуно заводышто, фабрикыште, пасушто да моло вере пашам тыршен ыштат.

Мыят шкемын йöратыме Нефтекамск олам, поро калыкем, шочмо кундемем дене кугешнем да нигунамат шÿмем гыч луктын ом кудалте, нуно эре ушыштем лийыт.

Арина Ахметьянова:

Шочмо йылме кажне еҥын илышыштыже кÿлешан. Тудо, чыла моло йылме семын, калыкым, шочмо Пошкырт кундемым, пÿтынь элым йöраташ туныкта, икте-весе дене келшен илаш ÿжеш.

Каныш кечылаште ме Ушмен ялыш коштына. Тушто йолташем-влак дене марла мутланена. Тидыже мыланем шочмо йылмым тунемаш полша. Тушто ковамын шондыкыштыжо мотор марий тувыр-влакым ужынам, марий пайрем-влакыште ныжылге, сылне марий муро-влакым колынам.

Анастасия Идулбаева:

Мый кумшо классыште тунемам. Марла кружокыш йывыртен коштам. Тушто ме лудына, возена, почеламутым тунемына, мурым мурена, марла кутыраш тунемына. Мый тÿрлö мероприятийлаште шке виемым тергем да моштымемым ончыктем. Туныктышына мемнам кажне ийын марий ёлкыш намия. Кож йыр модын, воштыл, веселан пöрдына. Сылне почеламут, ныжыл муро, весела куштымаш-влак шочмо йылмым ÿчашен тунемаш таратат.

Кирилл Сергеев:

Мылам индеш ий. Мый спортын тӱрлӧ видше коклаште утларакше хоккейым йӧратем! Спорт - тиде модыш огыл, а кажне кечын чот тыршыме паша. Авам ден ачам мыйым вич ияш улмем годымак ий полатыш «Торос» хоккей клубыш кондыштараш тÿҥальыч.

Икымше тренировкышто неле лийын: мунчалтымем годым шуко гана сÿмырленам, сусыргенамат. Кеч-могай нелылык годымат мыланем авам ден ачам поро сугыньым пуат. Хоккей дене модаш кажне кечын кошташ тыршем. Ме тÿрлö олалашке миена, таҥасымашлаште ончыл верлам налына.

Мый ешыштына икымше икшыве улам. Юрий да Александр шольым-влак йочасадыш коштыт. Саша шольымат, эше ныл ияш веле гынат, коньки дене мунчалташ чот йӧрата. Мый тудлан полшен шогем.

Читайте нас:

Главный редактор - Губаев Игорь Иванович.

При использовании материалов гиперссылка на сайт cholman.info обязательна.

Категория информационной продукции 12+

Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.

Мы в соцсетях:

ВКонтакте - vk.com/cholman

Telegram - https://t.me/cholmantv

Я.Дзен - https://dzen.ru/cholman

ОК - ok.ru/cholmanrb

TikTok - tiktok.com/@cholman.tv

Телефон

Телефон: 8(34783)7-07-97.

Электрон почто

[email protected]

Адрес

Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж. Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».