Все новости
Шинчымаш кугорнышто
24 Кылме 2019, 14:31

Киса-влак веселан вычыматышт

«Ромашка» йочасадыштына ий еда 12 ноябрьыште «Кисагайыкын кечыже» пайремым эртарена.

Вес семынже тудым «Зиновий-синичник» манына. Тыге телылан мемнан кундемыште илаш кодшо кайык-влакын кечыштым палемдена. Йочасадыш коштшо икшыве-влак дене ончылгоч телылан кодшо да шокшо элыш чоҥештен кайыше кайык-влак нерген мутланымашым эртарена. Тыгак почеламутым лудына, туштым туштена, калыкмут ден палым шымлена, кайык-влак нерген муро ден куштымашым тунемына, кайык-влакын илышыштым эскерена, кормушкым ямдылена.
Но пайремын тӱҥ озаже - киса! Тудын оҥайын вычыматымыже оҥгыр йӱкым ушештара. 12 ноябрь тыгак ожнысек телымсе сонарлымаш да колым кучымо кече семын палыме лийын. Пайремыште йоча-влаклан утларакшым ава-ача-влак дене пырля ямдылыме кормушкым пушеҥге укшыш сакалаш келша. Йоча-влак кайыкым пукшаш йӧратат. Шулдыран йолташна-влакым ме тӱрлӧ шӱраш, свежа коя, тыгыдемдыме арахис, кечшудо, тӱрлӧ емыж дене сийлена. Кормушкын арулыкшымат эскерена. Кайык-влакын кочкышышт эре яндар лиймым эскерена.
Тиде ойыртемалтше пайрем телымсе йӱштӧ игече лишеммым шижтара. Тыгай кече экологий нерген тургыжланыше кажне айдемылан лишыл лийшаш. Тек кажне кормушко икшыве-влаклан кугу куаным конда, кайык-влакым мемнан вер-шӧрыш толаш тарата да нунылан телым сайын илен эртараш полша.

Читайте нас в