27 сентябрь - Воспитательын кечыже: Салам лийже, йочасад!

Йочасад - кажне изи ньогалан кӱлешан жап. Тудо илышыштыже мондалтдыме кышам кода. Икшывым «подготовительный этап» манме йыжыҥлан ямдылыме сомылым ава-ача ден воспитатель-влак пырля, ик ой дене виктарышаш улыт. Тиде жапыште ава-ача-влак йочам кече режимым эскераш, вургемым шкевуя чияш-кудашаш, полышым йодаш, ӱстел коклаште совла дене пайдаланаш, кӧршӧкыш шинчаш, кидым мушкаш, шке арверым, вургемым муын мошташ туныктышаш, пырля шукырак модшаш улыт. Йочасад нерген сайым ойлымо уда огыл лектышыш шуаш полша. Тыге икшыве йочасадыште «адаптаций» манме йыжыҥым эрта…

Тиде ошкыл иканаште огыл, эркын шуйна. Изи ньоган йочасадыште лийме жапшым кечын кужемдыман. Тыге тудо ава-деч куштылгынрак ойырлен кодаш тӱҥалеш. Изи ньога-влак моткоч пӱсӧ шижмаш дене ойыртемалтыт, садлан ава-ача икшывым йочасадыш ласка чон, ӱшан дене ужатен кондышаш да кодышаш. Йоча ава-ача ден воспитатель кокласе вашкылым чӱчкыдын ужшаш. Тӱҥалтыш жапыште икшыве суртшо гыч йочасадыш йӧратыме модышыжым конден кертеш.

Адаптаций жапыште мый эше ик сай йӧным кучылтам. Ме группысо йоча-влак дене чӱчкыдын еш альбомыштым ончена. Тудым кеч-кунам лаштыклен кертеш. Шочшыжо-влакым ужын, нунын лишне улмыштым шижеш, лыплана.

Ава-ача-влаклан йочасадыш икшывым налаш сай кумыл дене мийыман. Ньоган кечым кузе эртарымыж нерген ласкан йодыштман. Икшывым мокталташ кумылдам ида чамане. Йоча тудын сеҥымашыж дене кугешнымыдамат шижшаш.