45 ий гыч… класс шагат

Палемдыме жаплан ме Калтаса селасе «Городок» кафеш погынышна. Кумло еҥ гыч латиктын веле чумыргенна. Чаманен каласаш логалеш, Лида Калиева ден Римма Аптраева ош тӱня дене шукертак чеверласеныт. Молына тӱрлӧ амал дене миен кертын огытыл.

Вашлиймашна пеш шокшын да веселан эртыш. Южына чот вашталтын, «Тиде кӧ?» йодышат лекте. Погынышо-влак - Анна Айдимирова, Люда Амиева, Дуся Васиева, Ульяна Вайтина, Света Васильева, Лида Давлетбаева, Соня Изимариева, Роза Исинбаева, Роза Шаякбаева, Нина Хайретдинова, Римма Яманаева да мемнан пагалыме класс вуйлатышына Надежда Ивановна Бушкова. Ятыр ийготым поген гынат, мӱндыр корным ончыде, мемнан дене вашлияш толын. Мыланнат, тудланат кугу куан лие.

Вашлиймаш чынжымак класс шагат семын эртыш. Тольык урок лу минут, а перемен нылле вич минут шуйнышт. Кажнына вашталтынна, ӱпна чалемын, кап-кылна вестӱрлемын. Кумылна дене студент годсо гай улмо семын чучеш гынат, шоҥгемынна. Чыланат кова-коча улына. Тидыжым шке нерген ойлымо годым палышна. Чылан гаяк, школышто ыштен, пенсийыш лектынна.

Тӱрлӧ модыш дене модна, конкурс-влакым эртарышна. Лида Давлетбаева руш йылмым шарналташ таратыш, оҥай йодыш-влакым ямдылен ыле. Изиш вуйым пудыратен, вашмутым кычалын вашештышна содыки. Надежда Ивановнан тиде ийлаште эртыше илышыже нерген ойлымыжым пеш тӱткын колыштна. Пуйто чынак класс шагат але марий йылме урок… Пеш чулым, таза улеш. Мылам гын йӧршын вашталтдымыла койо. Ончыкыжымат тыгаяк таза-эсен, чолга лийже. Кажнына тудлан поро, тау мутым ойлышна. Тунемме жапыште ныл ий мыланна авана семын ыле. Кунам кӱлеш, вурсен, кунам кӱлеш, моктен. Мемнам экскурсий дене Йошкар-Ола, Волгоград, Уфа олалаш кондыштарыш. Уфа оласе циркыш, театрыш мийымым шотленат от пытаре. «Астрахань олаш арбузым погаш намиен шым керт», - чаманен каласыш. Тунемме жапыште ала сыратеннат тудым, садлан извиненийым йодна. Уло кумыл дене пӧлекнам кучыктышна. Пеш кугу таум ойлыш. Йӧратыме мурыжымат муралтышна. Мияш сӧрышӧ ди-джейна ыш мий гынат, ме тидым ышна шиж. Тунеммына годымат йокрокланен ышна иле. Мом-гынат эре шонен луктынна, веселитленна. Могай гына организацийлашке концерт дене ышна мие! Уста гармонистна Ульяна Вайтина баян дене шокталтен мурыктыш, куштыктыш. Эше тиде жаплан шкенжын возымо мурыжым пӧлеклыш. Пешат кугу тау Улялан. Ончыкыжымат тыгаяк уста лийже. Вучыдымын Сонянат баян дене шоктен муралтыш.

Могай гына мурынам ышна йоҥгалтаре! Нинан студент годсо фото-влак гыч ямдылыме фотостендшым ончен, самырык жапнам шарналтышна. Фото-влакым ончен, шкенан дене лийше оҥай случай-влакым шарналтен, рӱжге воштыл шинчышна. Вашлиймаш куд шагат шуйныш гынат, омеш ужмо гай чучеш - писын эртен кайыш.

Таза лийына гын, вич ий гыч 12 июлеш тыгак погынаш кутырен келшышна. Тумарте чылаланнат таза-эсен лияш пӱрыжӧ. Вес ийлан шукына 65 ийым тема. Кӧн жапше лиеш гын, юбиляр дек мияш мутланен келшышна. Икте-весылан шкенан адреснам пуышна да шочмо кечынам кунам палемдыме нерген ушештарышна.

Тиде возымемым вашлиймашыште лийдыме йолташна-влакат, «Чолман» газетым налыт гын, лудыт, шонем. Мийыдымыштлан чаманенат колтат, очыни. Ме тендам поро мут дене шарналтышна. Вес гана вашлиймеш, чылаланнат таза-эсен лияш да уэш вашлияш тыланем.

Июль тылзыште педучилищыште физикым туныктышо Михаил Минильбаевич Мадияровым 80 ияш юбилейже дене шуко студент саламлыш. Пеш поро, чыным йӧратыше, сай туныктышо. Меат, Надежда Ивановнан классше, 1974-ше ийысе выпуск лӱм дене тиде саламлымашыш ушнена.