Арзамат школыш коштыныт

Тений тидлан 50 ий темме лӱмеш М. Ибаева, З. Шипаева, Е. Ямурзина нуным вашлиймашке чумыраш шонен пыштеныт. Тушко 12 выпускник миен. Школышто кугурак пионервожатыйлан ыштымемым шарналтен, мыйымат ӱжыныт ыле.

Кандашымше класс деч вара ӱдыр-влак чылан пырля Дуван ялозанлык техникумыш тунемаш каяш каҥашеныт, но тӱрлӧ амал дене нылытше гына каен. Е. Ямурзина, Л. Янгуатова, Л. Байбулдина, тунем лекмекышт, ветеринарлан ыштеныт, но илыш вашталтмылан кӧра вес пашашке кусненыт. З. Тимофеева да Г. Васильева кооперативный техникумышто тунемыныт да лапкызылан, З. Шипаева да Г. Асмаева Рефанде совхозышто бухгалтерлан ыштеныт. А. Алкиева да М. Ибаева Йошкар-Олаште МГПИ-м тунем лектыныт, шке шочмо школыштышт туныктеныт. Л. Яркаева, пенсийыш лекмешкыже, Мишкан ПМО-што каменщиклан тыршен. Д. Изиляева ял гыч каен огыл, софхоз фермыште дояркылан ыштен, презым ончен. Н. Салмиянова Уфаште токарьлан ыштен, чонжо шочмо кундемыш ӱжмылан кызыт ялыште ила. А. Ибаев фермыште, С. Салиев Уфа воктенсе «Алексеевский» совхозышто механизаторлан ыштеныт.

Тунамсе ӱдыр-рвезе-влак ынде чылан коча-кова, южышт кугезе коча-кова лийыныт, уныкаштым ончаш полшат. Классышт пеш келшен илыше ыле. Кызытат икте-весыштым огыт мондо, йӧн улмо годым вашлийыт, телефон дене йыҥгыртат.

Вашлиймаш сайын эртыш, ончычсо школ илыш гыч шуко оҥай историйым шарналтышт, А. Ибаев артист гае чылаштымат куандараш тыршыш. Вес гана эше вашлияш ойым ыштен чеверласышт.