Паша пукша. Паша йӱкта. Паша илышым шуя

Нуным тыште йол ӱмбак пеҥгыдын шогал мошташ туныктеныт, теорий ден практикым иктыш ушен, ял озанлыклан кӱлешан пашаеҥ-влакым ямдыленыт. Колледжын студентше-влак спортыштат, моло профессиональный таҥасымашлаштат, «Эрвел» куштышо ансамбльыштат шуаралтыныт, мастарлыкыштым ончыктеныт. Нуно илышыште шке верыштым муыт. Тидлан директор В. Байбулатов ӱшана, вет туныктымо кӱкшыт дене Мишканысе колледж республикыште ончыл верыште кая. «Пашам тыршен ышташ да тунамак молынат пашажым аклен мошташ тунемза, кеч-куштат кӱлешан да пагалыме лийза», - чон почын ойла выпускникше-влаклан Валерий Тимиргалиевич кажне ийын чеверласыме годым.

Вуйлатыше да туныктышо, производственный мастер-влак колледж гыч ял озанлыклан пашазе тукымым ямдылен лукташ вийыштым чаманыде тыршат. Нуно пеш кӱлешан сомылым шуктат - ялысе илышлан пашаче вийым гына огыл, у шӱлышым пуат.

Агроколледжын директоржо В. Байбулатов выпускник-влакым саламла.