30 ий гыч вашлиймаш…

Июнь мучаште тыгай пайрем Чорай школыштат лие. Вашлиймашке 30 ий ончыч школым тунем пытарыше-влак погыненыт ыле. Эн ончыч обелиск воктеке пеледыш аршашым пыштышна. Тиде шергакан вер йыр шогышо куэ-влакым ожно изиракна годым шкеак шынденна ыле. Кызыт нуно мотор пушеҥгыш савырненыт, мардеж пуалме еда толшо еҥ-влак дене шып кутыралтат.

«Тиде пайремым кужу жап шарнен илаш тӱҥалына!»

Школ коридор дене ошкылмо годым шӱмна изи йочанла пырткаш тӱҥале. Класс пӧлем-влакым шарналтен, шкенан вернам муын, парт коклашке верланышна. Школ музейыште историйым туныктышо Е.М. Николкин пеш оҥай экскурсийым эртарыш. Вашлиймаш мучко мемнан пелен Бронниковмыт еш лие. 30 ий ончыч нуно Чорай школышто пашам ыштеныт: Эмма Петровна математикым туныктышо да 10 «А» классын вуйлатышыже, Сергей Анатольевич школ директор да химий ден биологийым туныктышо ыльыч. Чаманен каласаш логалеш, 10 «Б» класснан вуйлатышыже, марий йылмым туныктышо А.А. Абукаев ош тӱням коден каен.

С.А. Бронников мемнан классым ачана семын вашлие. Класс журнал почеш лӱмнам каласен, кӧ улым да укем палемдыш. Южо йолташна пашалан верч вашлиймашке миен кертын огыл. Тиде тӱня дене чеверласыше йолташна-влакым шинчавӱд йӧре шарналтышна…

Вашлиймашке икымше туныктышына-влакымат ӱжынна ыле. Ийгот да тазалыклан кӧра чылан тушко логалын ышт керт, но мийышышт мемнам самырык шӱлышышт дене ӧрыктарышт! Г.З. Зай-нитдинов, Н.И. Танцитова, Л.П. Ахметьянова да икымше туныктышына-влак сай мутым, школ жапысе весела историй-влакым каласкалышт. Нунылан, Л.П. Танцитовалан, Л.З. Бронниковалан, А.А. Алексеевалан, Е.С. Сагадеевалан, И.А. Апаевлан, В.Д. Кадеевлан, Ю.Я. Яшкинлан, М.К. Ялаевалан да моло туныктышо-влаклан мемнам йӧратен туныктымыштлан, ончыкылык илышлан кӱлеш шинчымашым пуымыштлан кугу таум ойлена! Чыла тиде кӱлеш лийын - кажнына илышыште шке вержым муын. Коклаштына туныктышо, военный, врач, парикмахер, юрист, фотограф, тракторист, вольык ончышо да молат улыт…

Пайремыш мийыше уна-влак мемнан выпускым икте-весе дене келшыше, весела да креативный семын палемдышт. Тиде ганат ватсаппыште посна тӱшкам ыштенна, чыла йолташна да туныктышо-влаклан лӱмын футболкым ямдыленна, вашлиймашлан гимн шотан мурым возенна да чылан пырля муралтенна, ий шот дене 30 гана салютым колтенна... Пайремым эртарымашке кажныже шке надыржым пыштен. Нунын коклаште Валерий Шамиевым, Вячеслав Минушиным, Вера Байгузинам (Сайпушевам), Надежда Изиляновам, Марина Губеевам палемдыме шуэш. Павел Янситов тӱмыржӧ, Сергей Шамраев тальянкыж дене кумылнам утларак ылыжтен колтышт.

Школым пырля тунем лекше-влакын вашлиймашышт - нимо дене таҥастараш лийдыме пайрем! Тушко мияш кӱлешак! Шарналташ, мо ожно лийын, пырля воштылаш, самырык годсо мурым ушештараш, кужу жап уждымо йолташым ӧндалаш… Пеш йӧсӧ пайрем деч вара ойырлаш! Пеш кугу куан вучаш у вашлиймашым! А вашлиймаш лиеш! Эше шуко-шуко гана.