Тау тыланда, кайык-влак!

Тидын шотышто поснак кугу тӱткышым шочмо кундемын историйжым, йылме, тӱвыра поянлыкшым шымлыме йодышлан ойырена. Йоча-влакым Пошкырт кундемыште илыше тӱрлӧ калык-влакын илыш-йӱлашт дене кумданрак палдараш, икте-весе коклаште келшымаш кылым пеҥгыдемдаш тӱрлӧ пайремым эртарена. Тиде сомылышто «Мыйын шочмо кундемем» кружок кугу полышым пуа. Шукерте огыл изи икшыве-влак дене «Шемгоракын пучымышыжо» пайремым ямдылышна. «Шемгоракын пучымышыжо» - тиде йоча-влакын шошымсо ик эн йӧратыме пайремышт. Ме, эрдене мотор вургемым чиен, тӱрлӧ группыш унала миен, шӱрашым, шӧрым, ӱйым, шинчалым, сакырым погышна. Пучымыш кӱмеке, сылне муро, почеламут дене чылам уремыш пайремыш ӱжна. Мучашлан, сылне шошым кондымыштлан тауштен, кайык-влакым тутло пучымыш дене сийлышна.