Шке йылмынам огына кудалте. Ме тудын дене шочынна

Изирак классыште тунем-ше-влак марий шӱлыш улмым шижтарышт, а нылымше классыш коштшо марий вургеман ӱдыр-эрге-влак вес школла гыч толшо туныктышо-влакым вашлийыч. Уна-влак, кок тӱшкалан шелалтын, кок классыш урок-влакым ончаш кайышт.

Икымше классым туныктышо М.А. Сыртланова руш йылме урокшым, тӱрлӧ метод-влакым кучылтын, кызытсе илышлан келыштарен пуэн. Урок пеш сайын эртен.

Нылымше классыште Н.А. Минликаева марий йылме да литератур пӧлемыште марла лудшаш урокым ончыктыш. Икшыве-влак тушко марла чиен толыныт. Урокышто шочмо йылмын вияҥ толмо корныжым шергал лектыч. Тунемше-влак тале писатель, поэт-влакын шочмо йылме дене кугешнен каласыме мутыштым ушештарышт, марий йылмынан кӱлешлыкше нерген ойлышт.

Кугурак классыште тунемше-влаклан «Улам марий - марла ойлем» тема почеш сочиненийым возаш темленна ыле. Тиде пашаш нуно уло кумылын ушнышт. Иктешлымек, Алсу Асмеевам (9 класс), Каролина Исламовам (6 класс) да Диана Кунаккузинам (6 класс) сеҥышылан шотлышна.

Тиде кечын шушаш пайрем-влакымат палемден кодышна. Кокымшо класс туныктышо В.Г. Минликаеван вуйлатыме почеш ямдылыме «Мемнан армийна эн тале!» концертым, Л.К. Исламован тарватыме «Марий ӱдыр - чолга шӱдыр» конкурсым ончышна. Туштыжо «чолга шӱдырлан» Валентина Булатовам (9 класс) ойырышна.

Тыге школыштына шочмо йылмын кугу куатан улмыжым умылаш полшена, тиде шижмашым йочан шӱм-чоныш шыҥдараш тыршена.