Павасолаштат лектышышт тӱвыргӧ

Ленинградым блокада деч утарымылан 75 ий темме лӱмеш уло школ дене обелиск воктеке пеледыш аршашым пыштеныт. Визымше классыште тунемше йоча-влак почеламутым лудыныт. «Мый - шымлызе» кружокыш коштшо тунемше-влак «Ленинград дневник» шарнымаш урокым эртареныт. Кудымшо класс йочамыт «Булочныйыш черет» сценкым ямдыленыт.

Э. Гараева ден Р. Исламов блокадыште улшо шужен ярныше ӱдыр-эрге-влакын йӧсӧ илышыштым модын ончыктеныт. Ленинград ӱдырым В. Тамиева келыштарен. Кандашымше классыште тунемше А. Никифорова патырлыкым ончыктышо почтальон нерген ойлен.

Совет войскам Афганистан гыч лукмылан 30 ий темме лӱмеш февраль кыдалне Патырлык урокым эртарыме. Тунемше-влак Васола ялеш шочын-кушшо воин-интернационалист В. Ванин дене вашлийыныт. Визымше классын тунемшыже-влак класс вуйлатышышт А. Апликаева дене пырля куштымашым ямдыленыт. Кандашымше классын тунемшыже Л. Тамиев «Малая академия» конкурслан ямдылыме шымлыме пашаж дене палдарен. Афган сар корным тудын ачаже Людвик Тамиеват эртен.

Ачамландым аралыше-влакын кечышт лӱмеш «А ну, рвезе-шамыч!» конкурсым ямдыленыт. Рвезе-влак турникыште нӧлталалтыныт, винтовка дене лӱйкаленыт, автоматым рончен погеныт, противогазым чиеныт. Школын командыже районысо таҥасымаште лийын. Индешымше классын тунемшыже А. Ахмадиев турникыште нӧлталалтме дене районышто кокымшо верым налын. Кажне класс ӱдыр-влак эрге-шамычым саламленыт. Тӱҥалтыш классын тунемшыже-влак, ачамытым ӱжын, спорт таҥасымаште ӱчашеныт. Йоча-влак ачаштлан шке кид дене ямдылыме открыткым пӧлекленыт.

Иктешлыме линейкыште школ директор Л.М. Атналина конкурс ден мероприятийыште тыршыше йоча-влаклан Чап грамотым кучыктен.