Все новости

«Регион-влак кокласе олимпиадыш мийышна»

Февраль мучаште Марий Эл Республикын рӱдолаштыже марий йылме да литератур дене регион-влак кокласе олимпиаде эртыш.

Башкортостанысе марий тунемше-влакын чапыштым аралаш Мишкан район гыч мемнан республикысе олимпиадыште сеҥышыш лекше вич тунемше: С. Апкадирова (11 класс), А. Аптыкаева (9 класс, Ардаш школ), Г. Губеева (10 класс), А. Тимиркаева (9 класс, Чорай селасе Я. Ялкайн лӱмеш марий гимназий), А. Николаева (10 класс, Тынбай школ) - мийышт. Нине ӱдыр-влак шочмо йылмым палымаште келге шинчымашым ончыктышт. Чыланат кокымшо верым налын тольыч. Нуным туныктышо-влак А.Б. Чаплыгина, О.В. Иркабаева (Чорай селасе марий гимназий), Н.П. Минаева (Тынбай школ), Н.Д. Байдимирова (Ардаш школ) ямдыленыт.
Тыгай кужу корным эртымеке, кузе Йошкар-Олам ужде толат?! Тудыжо моткоч моторештын. Олимпиаде деч вара йоча-влак дене Марий Элын рӱдолажым ончен савырнышна. Чорай ялын чолга ӱдыржӧ Т. Токтарова экскурсовод семын мемнам ола дене палдарыш. «Марий Эл радио» тӱвыра учрежденийыш пурышна. В. Аптулаев ден С. Карпов мемнам уло кумылын вашлийыч, изирак экскурсийым эртарышт. Радиопередачым эртарыме пӧлемлам ончална, эфирым кузе вӱдымым эскерышна. Ӱдыр-влак шкеат «Покто веле, корным ачаленыт» эфирыш ушнышт.

Тыгай лектышан да пайдале мероприятийыш мийымаш полыш деч посна ок эрте, сандене район администрацийлан, образований пӧлкам вуйлатыше С.А. Александровлан, методист А.С. Килинбаевалан регион-влак кокласе олимпиадыш миен толаш йӧным ыштымыштлан таум каласена.
Читайте нас в