Шочмо элым аралыше-влакын пайремышт лӱмеш

ОБЖ туныктышо Т.А. Минликаев да 9-ше классыште тунемше-влак Чечняште геройла колышо Юрий Абдреевын аважым пайрем дене саламлаш миен тольыч. Тиде кечынак капитальный ачалымаш деч вара спортзалым почыч. Тудым «Единая Россия» партийын «Йоча спорт» проектше почеш уэмдышт. Ачалыме пашалан 600 тӱжем теҥгем кучылтмо, 70 тӱжем теҥгелан у спорт оборудованийым налме.

У сыным налше спортзалыште Элым аралыше-влакын кечышт лӱмеш тӱҥалтыш классыште тунемше-влак пайрем концертым ончыктышт (туныктышышт Н.М. Атнабаева, З.Б. Ильгузина). Тыгак школышто пашам ыштыше пӧръеҥ-влакым шокшын саламлышт.

«Самырык-влак тазалыкым пеҥгыдемдышт манын, спорт пайремым тарваташ шонен пыштышна. «Веселые старты», ӱстел теннис, ече дене таҥасымаш-влакым кажне ийын эртарена. Ӱшанена, вес ийын эше шукырак команде лиеш. Спортзалыш вес ялла гычат спортым йöратыше-влак модаш толышт, ынде тыште чыла йӧн уло. Уло кумылын вучена!» - каласыш школ директор Г.Ф. Габдрахманова.