Памашыште англичанла мурат

Памаш кыдалаш школ ончычат тыгай фестиваль-влакым эртара ыле. Тунам школ кӧргыштӧ веле лийын гын, тений район кӱкшытыш лукмо. Тидлан школнан йот йылмым туныктышыжо М.В. Ижбулдина тӱҥалтышым пыштыш.

Класс вуйлатыше да моло туныктышо-влакат у пашалан кид кергалтен пижыныт да сайынак ямдылалт шуктеныт. Паша ситышашлык ыле. Тиде сценарийым, вӱдышӧ-влакым ямдылымаш, актовый залым темылан келыштарен сӧрастарымаш (Тидыжым Н.С. Ижбулдина да В.Д. Файрушина мастарын шуктеныт, мурызо-влакым ямдылымаште СДК директор М.Р. Янышева да хормейстер Л.И. Сайсанова кугу полышым пуэныт.), костюм-влакым ургымаш, мурылан келыштарымаш да молат.

Муро пайрем тӱҥале веле, ӱдыр-рвезе-влакым саламлышыла, кава гыч кечыжат шыргыжал ончале. Сценыш пайремым вӱдышӧ-влак Я. Алексеева да Г. Киликаева лектыч. Ӱдыр-влак фестиваль-конкурсым сайын вӱдышт. Нуно школ директор И.А. Иксановалан мутым пуышт.

Фестиваль-конкурсым кодший сеҥыше П. Сайсанова почо. Тунемше-влак тӱрлӧ жанр дене выступатлышт - ансамбль, соло, трио, дуэт да молат. Иктешлымеке, лектыш тыгайрак лийын.

Муро пайрем ик шӱлыш дене, чаткан эртыш. Чылаштымат сеҥымаш дене саламлена. Ӱдыр-рвезе-влаклан тунеммаштышт чолгалыкым, у сеҥымашым, пиалым да тазалыкым тыланена.

Кугу таум школ директор И.А. Иксановалан каласыме шуэш: тудо огыл гын, тыгай творческий конкурс огешат лий ыле.