Ончыкылык илышлан ямдылат

Проект йодышлам 1 февральыште Уфаште школысо образованийын «Чоҥештен кӱзӧ!» икымше форумыштыжо келгынрак каҥашеныт. Образований министерство «пилот» шотеш лу-латик школым ойырен налаш да 1 сентябрь гыч ты кугу проектым апробироватлаш тӱҥалаш шона.

«Чоҥештен кӱзӧ» проект икмыняр модульым уша. «Руль воктеке шич» образовательный комплекс школышто тунемме годымак водитель правам налаш йӧным ыштышаш. «Йоҥгатан ойло» тунемше-влаклан кутырымо англичан йылмым вияҥдаш полша. «Чын коч» модуль кочмо культурым шыҥдарышаш. «Спорт дене кылым кучо» кугурак класслаште тунемше ӱдыр-рвезе-влакым спортын тӱрлӧ видше дене заниматлаш таратышаш. «Таза шыргыжмаш» проект почеш 800 еҥ деч шукырак тунемшан школлаште стоматологий пӧлем-влакым почшаш улыт. Тусо стоматолог-влак дек изирак школла гыч график почеш кошташ тӱҥалыт. «Калык ончылно ойло» комплексыш риторика занятий-влакым пуртат. «Кушталте» модуль классический куштымаш-влакым, вальсым да молым, тунемаш йӧным ышта. Ты проектыш тыгак еш илышым ворандараш туныктымо, шочмо кундемым, калыкын йӱлажым да тӱвыражым шымлыме, спортын калыкле видше-влаклан шӱмаҥдыме да моло занятийлам ешарат.

Форумын участникше-влак проектыш робототехника да IT-технологий дене занятий-влакымат пурташ темленыт. «Мемнан школлаште физика, химий да моло предметла дене уда огыл шинчымашым пуат, а IT-технологийым, робототехникым южо вере гына туныктат. Тыгай профилян специалист-влак кызыт шукын кӱлыт. Мыйын шонымаште, школлаште IT-технологий да робототехника кабинет-влак лийшаш улыт, ме полшаш ямде улына», - каласен УГНТУ-н ректоржо Р. Бахтизин.

Форумыш погынышо-влак «Чоҥеш-тен кӱзӧ!» проектым оҥайлан, пайдалылан шотленыт. Тудо ӱдыр-рвезе-влаклан конкуренцийым сеҥен кертше лияш, кӱлешан шинчымашым погаш, ончыкылык илышыште шке верым муаш полшышаш.